रंगेलीको माछा पोखरी दाजुभाइ डुबे : एक जनाको मृत्यु, एक जना घाइते

विराटनगर । मोरङको रंगेलीमा पोखरीमा डुबेर एक जनाको मृत्यु भएको छ । एक जना घाइते भएका छन् ।

रंगेली नगरपालिका–५ भेरुवाथानस्थित मामाघर गएका नाबालक दाजुभाइ मंगलबार दिउँसो पोखरीमा डुबेका थिए ।

प्रहरीका अनुसार मोरङको कटहरी गाउँपालिका–५ घर भएका रञ्जीत ठाकुरका छोराहरु २ वर्षीय नीरज र ६ वर्षीय मनिष ठाकुर रंगेलीस्थित मामाघर गएका थिए ।

दुवै जनालाई मामाघरको पछाडि रहेको पोखरीमा डुबिरहेको अवस्थामा दिउँसो १२ बजेतिर फेला पारिएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए ।

उनका अनुसार दुवै जनालाई घाइते अवस्थामा उद्धार गरेर उपचारका लागि रंगेली अस्पताल लगिएको थियो । अस्पताल पुर्याउनसाथ भाइ नीरजलाई चिकित्सकले मृत घोषित गरेको थियो ।

मध्यम अवस्थाका मनिषको उपचार भइरहेको छ । डीएसपी बस्नेतका अनुसार नाबालक दाजुभाइ खेल्ने क्रममा त्यहाँ पुगेको र पोखरीमा खसेर डुबेको हुनसक्ने देखिन्छ ।