झापामा महिलाको हत्या, श्रीमान पक्राउ

झापा । झापामा एक महिलाको हत्या भएको छ । हत्यामा संलग्न भएको आरोपमा प्रहरीले मृतकको  श्रीमतीलाई नियन्त्रणमा लिएको छ ।

मंगलबार बेलुका शिवसताक्षी नगरपालिका–८ शिवालय टोल बस्नेत अन्दाजी ४७ वर्षीय ओमप्रकाश अधिकारीले पत्नी अन्दाजी ५२ वर्षीया रञ्जना गौतम अधिकारीको हत्या गरेको प्रहरीले जनाएको छ । झापा प्रहरीका प्रवक्ता डीएसपी कृष्णकुमार चन्दका अनुसार घरयासी विवादका कारण पतिले पत्नीको घाँटीमा खुकुरीले हानेको प्रारम्भिक अनुसन्धानबाट खुलेको छ ।

साँझ ६ः३५ बजेतिर पतिले खुकुरी प्रहार गर्दा रञ्जनाको घटनास्थलमै मृत्यु भएको डीएसपी चन्दले बताए । उनका अनुसार पत्नीको हत्यामा संलग्न ओमप्रकाशलाई खुकुरीसहित पक्राउ गरिएको छ । ओमप्रकाशविरुद्ध कर्तव्य ज्यान मुद्दा चलाउने प्रहरीको तयारी छ । घटनाको थप अनुसन्धान भइरहेको जानकारी उनले दिए ।

झापामै बाबुले दाउ प्रहार गरेर छोरालाई घाइते बनाएका छन् । मेचीनगर नगरपालिका–३ दोकान डाँडाका ५७ वर्षीय पुण्यप्रसाद दाहालले आफ्नै छोरा अन्दाजी ३० वर्षीय डिल्लीराम दाहाललाई साँझ ७ः१० बजेतिर दाउले प्रहार गरेको डीएसपी चन्दले बताए ।

उनका अनुसार खाना खाने विषयलाई लिएर विवाद हुँदा बाबुले छोरालाई धारिलो हतियारले हानेको प्रारम्भिक अनुसन्धानबाट खुलेको छ । बाबुले दाउ प्रहार गर्दा डिल्लीरामको टाउको पछाडिको भागमा चोट लागेको प्रहरीले जनाएको छ ।

सामान्य घाइते अवस्थाका डिल्लीरामको स्थानीय मेडिकलमा उपचार भइरहेको छ ।