आलाेचना भएपछि सभामुखले बोलाए प्रदेशसभा बैठक

विराटनगर । प्रतिपक्षी दलसँगै सत्तारुढ दलका सांसदले पनि दबाब दिएपछि कोशी प्रदेशका सभामुख अम्बरबहादुर विष्टले प्रदेशसभा बैठक बोलाएका छन् । ८ असारदेखि अनिश्चितकालका लागि स्थगित भएको प्रदेशसभा बैठक १८ भदौंका लागि बोलाएका हुन् ।

नेपाली कांग्रेसलाई सरकारमा सहभागी गराउन मन्त्रालय विभाजन गर्ने तयरी गरेका मुख्यमन्त्री हिक्मतकुमार कार्कीले सरकार विस्तारपछि मात्रै प्रदेशसभा बैठक बोलाउन सभामुखलाई आग्रह गरेका थिए ।

कांग्रेस दलका नेता उद्धव थापाले पनि तत्काल बैठक नबोलाउन आग्रह गरेका थिए । सभामुखले पनि  मुख्यमन्त्रीलाई सहज हुनेगरी दुई साता समय दिएर प्रदेशसभा बैठक बोलाएका हुन् ।

दुई तिहाई बहुमत सरकारको छायाँमा सांसद परेको भन्दै माओवादी केन्द्रले जनसरोकारका विषय र सरकारको कामबारे समीक्षा गर्न तत्काल प्रदेशसभा बैठक बोलाउन माग गरेको थियो ।

पूर्व मुख्यमन्त्री केदार कार्की र एमालेका प्रमुख सचेतक रेवतीरमण भण्डारीले पनि तत्काल बैठक बोलाउन माग गरेका थिए । मुख्यमन्त्रीको ग्रिन सिग्नल पर्खिरहेका सभामुख विष्टले सत्तारुढ दल एमाले र कांग्रेसका सांसदले पनि दबाब दिएपछि मुख्यमन्त्रीलाई सहज हुनेगरी दुई साताको समय दिएर बैठक बोलाएको प्रदेशसभा सचिवालय स्रोतले जनाएको छ ।

प्रदेशमा प्रदेश निजामती सेवा ऐन, २०७९ लाई संशोधन गर्न बनेको विधेयक, केही प्रदेश ऐनको साविकको व्यवस्था जगाउने सम्बन्धमा व्यवस्था गर्न बनेको विधेयक र प्रदेश कृषि व्यवसाय प्रवर्द्धन अनुदान ऐन, २०७७ लाई संशोधन गर्न बनेको विधेयक सरकारले संसदमा टेवल गरेको छ । प्रदेशसभा बैठक नबस्दा विधेयकमाथिको छलफल अघि बढेको छैन ।