प्रदेशसभा बैठक बोलाउन एमाले प्रमुख सचेतक र पूर्वमुख्यमन्त्रीको माग

विराटनगर । कोशी प्रदेशको प्रदेशसभा बैठक बोलाउन सत्तारुढ दलका सांसदले माग गरेका छन् । सरकारको नेतृत्व गरिरहेको नेकपा एमालेका प्रमुख सचेतक रेवतीरमण भण्डारी र नेपाली कांग्रेस सांसद तथा पूर्वमुख्यमन्त्री केदार कार्कीले तत्काल बैठक बोलाउन माग गरेका हुन् ।

कोशी प्रदेशसभाको बैठक दुई महिनादेखि बस्न सकेको छैन । बैठक नबसेपछि सत्तारुढ दलका सांसदले नै बैठक बोलाउन माग गरेका हुन् । प्रमुख प्रतिपक्षी दल नेकपा माओवादी केन्द्रले यसअघि नै बैठक बोलाउन माग गरेको थियो ।

नेकपा एमालेका कोशी प्रदेश संसदीय दलका प्रमुख सचेतक रेवतिरमण भण्डारीले तत्कालै बैठक बोलाउन सभामुखलाई आग्रह गरे । ‘ सरकारले चाहेन भनेर हुँदैन सभामुखले बैठक बोलाउनुपर्छ,’ प्रमुख सचेतक भण्डारीले भने,‘ दुई महिना भइसक्यो तत्काल बैठक बोलाउनु पर्छ ।’ सरकारको परामर्श गरेर सभामुख बिष्टले तत्काल बैठक बोलाउनु पर्ने उनको भनाई छ ।

प्रदेश सभाको बैठक नबस्दा प्रदेश सभामा दर्ता भएका विधेयकहरू अलपत्र परेको उनले बताए । सरकारको पूर्णताको विषयलाई देखाएर प्रदेश सभालाई लामो समय बन्धक बनाउन नहुने उनको भनाई छ ।

पूर्वमुख्यमन्त्री केदार कार्कीले कांग्रेसलाई देखाएर बैठक रोक्न नहुने बताए ।

‘नेपाली कांग्रेसको कारण कोशीको संसद बस्न नसकेको भन्ने समाचार हास्यास्पद हो न त दलको निर्णय न त दलको नेताको अभिव्यक्ति नै बाहिर आएको छ,’ उनले भने,‘ संसद् नियमावली अनुसार संसद् चल्छ। यो बर्खाको विपद्‌मा सबै भन्दा बढ़ी क्षति कोशीले व्यहोरेको छ । जनताको आवाज उठाउने थलो  संसद कुनै पनि बहानामा छल्न पाइदैन ।’ ८ असारमा प्रदेशको वार्षिक बजेट पारित भएपछि बैठक अनिश्चितकालका लागि स्थगित भएको थियो ।