एक वर्षमा १४ खर्ब भित्रियो रेमिट्यान्स, साढे चार लाख विदेशिए

काठमाडौं । नेपालमा एक वर्षको अवधिमा साढे १४ खर्ब रुपैयाँ रेमिट्यान्स भित्रिएको छ । नेपाल राष्ट्र बैंकले सार्वजनिक गरेको तथ्याङ्क अनुसार आर्थिक वर्ष २०८०–८१ मा १४ खर्ब ४५ अर्ब ३२ करोड रुपैयाँ रेमिट्यान्स भित्रिएको हो । यो अघिल्लो वर्ष २०७९–८० को तुलनामा १६.५ प्रतिशतले बढी हो ।

राष्ट्र बैंककले सार्वजनिक गरेको वर्तमान आर्थिक तथा वित्तीय स्थिति अनुसार गत आर्थिक वर्ष मासिक १ खर्ब २० अर्ब रुपैयाँ हाराहारीले रेमिट्यान्स भित्रिएको छ ।

अमेरिकी डलरमा रेमिट्यान्स यस वर्ष १० अर्ब ८६ करोड भित्रिएको छ । यो गत आवको तुलनामा १४.५ प्रतिशत धेरै हो । अघिल्लो आवमा अमेरिकी डलरमा विप्रेषण आप्रवाह १३.९ प्रतिशत धेरै भित्रिएको थियो ।

एक वर्षमा नयाँ अन्तिम श्रम स्वीकृति लिनेको संख्या ४ लाख ६० हजार १०३ रहेको छ । पुनः श्रम स्वीकृति लिनेको संख्या २ लाख ८१ हजार १९९ छ ।