बाढीले चार वटा घर र होटल बगायो

विराटनगर । खुम्बु पासाङल्हामू गाउँपालिका वडा– ५ मा पर्ने थामे गाउँमा एक्कासी आएको बाढीले केही घर होटल बगाएको प्रहरीले बताएको छ ।

खुम्बु पासाङल्हामू गाउँपालिका वडा– ५ मा पर्ने थामे गाउँमा आज दिउँसो एक्कासी आएको बाढीले चार वटा घर र होटल बगाएको हो । बाढीमा फसेका ५ जनालाई प्रहरीले उद्धार गरेको छ ।

सोलुखुम्बुका प्रहरी प्रमुख प्रहरी नायव उपरीक्षक द्वारिकाप्रसाद घिमिरेका अनुसार बाढी गएको स्थानमा नेपाल प्रहरी र नेपाली सेनाको टोली पुगेर उद्धारमा खटिएको छ ।

‘३–४ वटा घर र होटल बगाएको कुरा आएको सबै रिपोर्ट आइसकेको छैन,’उनले भने,‘ प्रहरी र नेपाली सेनाको टोली घटनास्थलमा छ, बाढीमा फसेका ६–७ जनाको उद्धार भएको छ ।’

बाढीले बगाएको र क्षति पूर्याएको घरको विवरण संकलन भइरहेको उनले बताए । उनका अनुसार थामे क्षेत्रका अधिकांश घरमा बाढी पसेको छ ।