काेशी प्रदेशमा पहिलाे कृषि एक्स्पोकाे तयारी

विराटनगर । नेपाल उद्योग वाणिज्य महासंघ कोशी प्रदेशले विराटनगरमा कृषि एक्स्पो आयोजना गर्ने भएको छ । २७ भदौदेखि ३० भदौसम्म विराटनगरसँग जोडिएको कटहरी कृषि थोक बजारमा कृषि एक्स्पो २०८१ आयोजना गर्न लागेको हो ।

कृषि एक्स्पोको प्रचारप्रसारका लागि महासंघको टोलीले विभिन्न क्षेत्रमा पुगेर अन्तरक्रिया गरिरहेको छ ।

महासंघका अध्यक्ष राउतले विगतमा काठमाडौं र चितवनमा मात्र सीमित रहेको कृषि एक्स्पो पहिलो पटक नेपाल उद्योग वाणिज्य महासंघले कोशी प्रदेशमा आयोजना गर्न लागेको बताए । एक्स्पो सफल पार्न कोशी प्रदेश सरकार र सम्बन्धित मन्त्रालय, नेपाल सरकार र स्विस सरकार विकास सहयोगको प्रवर्द्धनात्मक सहयोग रहने उनले बताए ।

नेपाल कृषि बजार विकास कार्यक्रम (सहज) र कटहरी गाउँपालिकाको सहकार्यमा आयोजना हुने कृषि एक्स्पोमा कृषि क्षेत्रका नवीनतम् प्रविधि, कृषि उत्पादन, पशुपंक्षीका दाना, भेटनरी लगायतका वस्तुहरूको प्रदर्शनी हुने जनाइएको छ ।

कृषि विज्ञहरूको सहभागितामा प्यानल छलफलसहित विभिन्न छलफल आयोजना गरिने अध्यक्ष राउतले बताए । एक्स्पोमा भारतको विहार राज्यबाटसमेत कृषि विज्ञहरू आउने र कृषि क्षेत्रका सवालबारे छलफल र परामर्श गर्ने जनाइएको छ ।

एक्स्पोले कृषक र कृषि व्यवसायीको मिलन मात्र गराउने नभई कृषकले उत्पादन गरेका वस्तुहरूको प्रवर्द्धन गरी उद्योग स्थापना गर्न प्रेरित गर्ने उद्देश्य रहेको उनले बताए ।

एक्स्पोमा सहभागी र अवलोकन गर्न आउने अन्तर जिल्लाका सहभागीहरूलाई निःशुल्क खाना तथा आवासको व्यवस्था गरिएको अध्यक्ष राउतले जानकारी दिए ।