काेशीमा मन्त्रालय थप्ने मुख्यमन्त्रीको सङ्केत

विराटनगर ।  कोशी प्रदेशका मुख्यमन्त्री हिक्मतकुमार कार्कीले नेपाली काङ्ग्रेसलाई सरकारमा सहभागी गराउनका लागि मन्त्रालय थप्न सक्ने सङ्केत गरेका छन् ।

सरकारमा सहभागी हुने निर्णय गरेको काङ्ग्रेस आन्तरिक किचलोका कारण सरकारमा सहभागी भएको छैन । कोशी प्रदेशमा काङ्ग्रेसको भागमा परेको ४ मन्त्रालय परेको छ ।

कांग्रेकाे संस्थापन पक्षले २, शेखर कोइराला र कृष्ण सिटौला पक्षले १–१ मन्त्रालय पाउने तयारी थियो । तर डाक्टर शेखर कोइराला पक्षले २ वटा मन्त्रालय माग गरिरहेको छ । काङ्ग्रेसलाई सरकारमा आउन सहज बनाउनका लागि मुख्यमन्त्री कार्कीले मन्त्रालय विभाजन गर्न सक्ने सङ्केत गरेका हुन् ।

सरकारलाई पूर्णता दिने कुरामा केही मन्त्रालयको सङ्ख्या बढाउने हो कि भन्ने कुरा पनि छ,’ उनले भने,‘ सकेसम्म हाम्रो प्रयास अहिलेकै मन्त्रालय सङ्ख्यामा मिलाउने कुरा भएको छ । प्रदेशको मन्त्रालयको सङ्ख्या अधिकतम भनेको ११ वटा हो । त्यहाँभन्दा माथि हामी जान सक्दैनौँ ।’

‘नेपाली काङ्ग्रेसको संसदीय दलका नेतासँग पनि कुरा गरेका छौँ । केन्द्रीय नेतृत्वसँग पनि कुरा भएको छ । मन्त्रालय थप गर्ने विषयमा केही कुरा आएको छैन ।’ उनले फेरि भने,‘नेपालको राष्ट्रिय राजनीतिको विषय तपाईंहरूले बुझ्नु भएकै छ । केन्द्रीय नेताहरूबाट केही कुरा आउला । अहिलेसम्म मन्त्रालय बढाउने कुरा छैन । अहिलेको लागि मन्त्रालय थप्ने कुरा हुँदैन । मेरो यो विषयमा स्पष्ट अडान रहन्छ ।’

नेपाली काङ्ग्रेस केही दिन भित्र सरकारमा सहभागी हुने बताउँदै उनले मन्त्रालय फुटाऊँ भनेर औपचारिक रूपमा कसैले नभनेको बताए ।

राजेन्द्रकुमार राई नेतृत्वको सरकारले २३ माघ २०७८ मा प्रदेशको ७ वटा मन्त्रालयलाई विभाजन गरी १३ वटा बनाएको थियो । हिक्मतकुमार कार्की मुख्यमन्त्री बनेपछि मन्त्रालय सङ्ख्या घटाएर ९ बनाएका थिए ।