धरान खानेपानी विवाद : महशुल घटाउने सहमति

विराटनगर । धरान उपमहानगरपालिकाको खानेपानी महशुल दर पुरानै कायम गर्ने सहमति भएको छ । १ साउनबाट धरानमा खानेपानी महशुल बढेकाे थियाे ।

आन्दोलनरत १० राजनीतिक दलसँगकाे वार्तापछि धरानका मेयर हर्क साम्पाङ खानेपानी सरसफाइ तथा सेवा निर्धारण आयोगको निर्णय मान्न तयार भएका हुन् ।

मेयर सम्पाङ र शुल्क वृद्धि फिर्ता लिन तयार भएसँगै आन्दोलनरत दलसँग तीन बुँदे सहमति भएको छ । सहमतिसँगै मेयर सम्पाङविरुद्ध धरानमा भई रहेको आन्दोलन फिर्ता भएको छ । 

नेपाली कांग्रेस धरानका सभापति श्याम पाेखरेलका अनुसार वृद्धि भएकाे महशुल तथा शुल्क स्थगित गर्ने, खानेपानी बोर्डको पूर्णता बारे अदालतको फैसला मान्ने र एक साताभित्र बोर्डको सम्पूर्ण हिसाब सार्वजनिक गर्ने सहमति भएको छ ।

खानेपानीको शुल्क र महशुलको बारेमा खानेपानी तथा सरसफाइ सेवा महशुल निर्धारण आयोगमा पठाउने सहमति भएको छ ।

खानेपानीको धारा जडान नामसारी र महशुल वृद्धिको खारेजीको माग गर्दै दुई साता अघिदेखि आन्दोलन हुँदै आएको छ ।

दलहरूले बोर्ड र बिल काउन्टर कार्यालयमा तालाबन्दी गरेका थिए । उच्च अदालतको आदेशमा ताला खोले पनि उपमहानगर कार्यालय घेराउ गर्दै नारा, जुलुस, प्रदर्शन गर्दै आएका थिए ।