मोरङको सुन्दरहरैँचामा महिलाको हत्या, श्रीमान पक्राउ

विराटनगर । मोरङको सुन्दरहरैँचामा श्रीमतीको हत्या गरेको आरोपमा एक पुरुष पक्राउ परेका छन् ।

मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार सुन्दरहरैँचा नगरपालिका–१० बाघझोडाका की ४१ वर्षीया पवित्रा फुयाँल नेपालको हत्या गरेको आरोपमा ५८ वर्षीय लक्ष्मण नेपाल पक्राउ परेका हुन् ।

लक्ष्मणले आइतबार बिहान ११ बजेतिर श्रीमतीमाथि खुकुरी प्रहार गरेको प्रहरीले बताएको छ । गम्भीर घाइते भएकी पवित्रालाई उपचारका लागि विराटनगरको नोबेल शिक्षण अस्पताल ल्याइएको थियो । उपचारका क्रममा आज दिउँसो १२ बजेतिर चिकित्सकले मृत घोषित गरेका थिए ।

लक्ष्मणले श्रीमतीलाई जथाभावी खुकुरी प्रहार गरेको प्रहरीले बताएको छ । खुकुरी प्रहारबाट अनुसार, टाउको लगायत शरीरका विभिन्न भागमा गहिरो चोट लागेको थियो । प्रहरीका अुसार अंश विवादका कारण पवित्राको हत्या भएको प्रारम्भीक अनुसन्धानबाट खुलेको छ ।

पवित्राको माइती मोरङको लेटाङ हो । प्रहरीका अनुसार श्रीमानले १६ धुर जग्गा किनेर श्रीमतीको नाममा पास गरिदिएका थिए । दुई जनाबीच झगडा भएपछि पवित्रा वैशाखदेखि माइततिर गएर बस्न थालेकी थिइन् । त्यसपछि लक्ष्मणले अदालतमा जग्गा रोक्का सम्बन्धी मुद्दा हालेका थिए । पवित्राले पनि सम्बन्धविच्छेद, घरेलु हिंसा र मानोचामल सम्बन्धी मुद्दा दर्ता गरेको पाइएको छ ।

मोरङ अदालतले दुवै जनालाई छलफलमा बोलाएर मुद्दामा मिलापत्र गराएको थियो । मिलापत्रपछि पनि माइत बसेकी श्रीमतीलाई मिलेर बस्नुपर्छ भन्दै लक्ष्मणले घरमा बोलाएर हत्या गरेको प्रहरीले बताएको छ ।

पत्नीको हत्यामा संलग्न लक्ष्मण खुकुरीसहित पक्राउ परेका छन् । लक्ष्मणविरुद्ध कर्तव्य ज्यान मुद्दा चलाइने डीएसपी बस्नेतले बताए ।