धरानमा विवाद : महशुल घटाउन ऋण मिनाहा गर्नुपर्ने मेयरकाे शर्त, काउन्टरमा दश दलको तालाबन्दी

विराटनगर ।  धरान उपमहानगरपालिका प्रमुख हर्कराज राई ( हर्क साम्पाङ) ले वृद्धि भएको खानेपानी महशुल र जडान शुल्क घटाउन एशियाली विकास बैङ्कबाट लिएको ऋण मिनाहा गर्नुपर्ने शर्त राखेका छन् ।

१ साउनबाट साम्पाङ अध्यक्ष रहेको खानेपानी व्यवस्थापन बोर्डले खानेपानी महशुल र जडान शुल्क बढाएको थियो । त्यसो विरोधमा १० राजनीतिक दल आन्दोलनमा छन् । उनीहरूले बढेको शुल्क घटाउन माग गरेका छन् । तर मेयर साम्पाङले भने बढेको शुल्क घटाउन एडीबीको ऋण मिनाहा हुनुपर्ने सर्त राखेका हुन् । ऋण मिनाहा नभए शुल्क नघट्ने उनले  बताएपछि १० राजनीतिक दलले खानेपानी बोर्डको महशुल सङ्कलन काउन्टरमा तालाबन्दी गरेका छन् ।

आइतबार पत्रकार सम्मेलन गर्दै साम्पाङले ऋण तिर्नका लागि महशुल र अन्य शुल्क बढाएको बताएका थिए । राजनीतिक दलहरूले सोमबार धरान उपमहानगरपालिका– ११, १५ र १६ नम्बर वडामा रहेको तीन वटा खानेपानीको काउन्टरमा तालाबन्दी गरेका हुन् ।

माग सम्बोधन नभएसम्म यो तालाबन्दी नखोल्ने सङ्घर्षरत दल मध्येको एक नेपाली काङ्ग्रेस धरान नगरसभापति श्याम पोखरेलले बताए । ‘हाम्रो धेरै माग छैन, बोर्डले पुरानै शुल्क कायम गरे ताला खोल्छौ,’ उनले भने,‘ बढेको शुल्क नघटेसम्म तालाबन्दी खोल्दैनौं ।’

पालिका प्रमुख अध्यक्ष रहेको धरान खानेपानी व्यवस्थापन बोर्डले १ साउनबाट लागुहुनेगरि खानेपानी महशुल र शुल्क वृद्धि गरेको  थियो ।

शुल्क घटाउनका लागि ११ साउनदेखि १० राजनीतिक दल आन्दोलनमा छन् । तर साम्पाङ घटाउने पक्षमा छैनन । नागरिक अभियन्ता हुँदा साम्पाङ शुल्क घटाउने आन्दोलनमा थिए । अहिले उनी ऋण तिर्नका लागि शुल्क बढाउनुको विकल्प नरहेको बताउँछन् ।   उनका अनुसार खानेपानी वितरणका लागि उपमहानगरले लिएको ५७ करोड १९ लाख रुपैयाँ ऋण तिर्न बाँकी छ ।

उनले आम नागरिकको घरमा जडान भएको धारामा धेरै शुल्क नबढेको बताए । धरानमा धेरै धारा हाफ इन्चको छ । २७ हजार ६३० वटा घरमा हाफ इन्च(१/२) इन्चको धारा जडान भएको उनले बताए । त्यस भन्दामाथिको धारा थोरै  रहेकाे उनले बताए ।

पहिले १० युनिटको १३० रुपैयाँ रहेकामा अहिले २० रुपैयाँ बढाएर १५० रुपैयाँ पुर्याएको उनले बताए । एक युनिटमा एक हजार लिटर पानी हुन्छ । १० देखि ३० युनिटमा प्रत्येक युनिटमा ३० रुपैयाँ शुल्क थियो । यो शुल्क परिवर्तन नभएको उनले बताए । ३० युनिटदेखि माथि भने प्रतियुनिट ५० रुपैयाँ  पुर्याएको उनले बताए । यसअघि ३० युनिट भन्दा माथि प्रतियुनिट ४५ रुपैयाँ थियो । ‘विदेशी ऋण तिर्नका लागि हाम्रो इज्जत बचाउनका लागि हो,’ उनले भने ।

२०७४ सालयता धरानमा खानेपानीको महशुल बढेको छैन । सबै क्षेत्रको भाउ बढेपछि जडान शुल्क र महशुल पनि बढाएको उनको तर्क छ ।