राजीनामा पछि हसिनाले देश छाडिन्, अन्तरिम सरकार बनाउने सेनाको घोषणा 

काठमाडौँ । प्रधानमन्त्री शेख हसिनाले राजीनामा दिएपछि बङ्गलादेशका सेना प्रमुखले अन्तरिम सरकार बनाउने घोषणा गरेका छन् ।

प्रधानमन्त्री शेख हसिनाको राजीनामापछि सेनाले अन्तरिम सरकार बनाउने घोषणा गरेको हो ।

सेनाका प्रमुख वाकेर उज जमनले देशवासीका नाममा सोमबार अपराह्न सम्बोधन गर्दै अन्तरिम सरकार बनाउने जानकारी गराएका हुन् । विभिन्न राजनीतिक दलका शीर्ष नेताहरूसँग छलफल भइरहेको उनको भनाइ थियो ।

विपक्षी दल बङ्गलादेश नेसनालिस्ट पार्टी नेताहरूसँग पनि छलफल गरिरहेको अलजजिराको समाचारमा उल्लेख छ।

प्रदर्शनकारीहरूबाट असुरक्षा महसुस भएपछि सेनाको हेलिकप्टर चढेर हसिना देश छाडेकी छन् । उनी भारतकाे त्रिपुरा पुगेकाे बीबीसीले जनाएकाे छ ।

जुलाई १५ बाट कोटा बिरोधी आन्दोलनमा ३०० बढीको ज्यान गइसकेको छ । आइतबार एकै दिन प्रदर्शनका क्रममा ९० जनाको ज्यान गएको थियो ।