झापा र मोरङबाट १३ जना ब्राउनसुगर काराेबारी पक्राउ

विराटनगर । प्रहरीले झापा र मोरङबाट लागूऔषधसहित १३ जनालाई पक्राउ गरेको छ । शनिबार दुई जिल्लाको विभिन्न स्थानबाट उनीहरुलाई पक्राउ गरेको हो ।

शनिबार झापाको इलाका प्रहरी कार्यालय अनारमनी र अस्थायी प्रहरी पोष्ट बसपार्कबाट खटिएको प्रहरी टोलीले बिर्तामोड नगरपालिका– ५ का ३२ वर्षीय विजय मगर, ३७ वर्षीय बिदुर मगर, मेचीनगर नगरपालिका– ९ का ४५ वर्षीय शेरबहादुर लिम्बू र माई नगरपालिका– २ इलामका ३० वर्षीय रूपेश ढुङ्गानालाई १ ग्राम ५४० मिलिग्राम ब्राउनसुगर सहित पक्राउ गरेको हो ।

इलाका प्रहरी कार्यालय दमकबाट खटिएको प्रहरी टोलीले चुलाचुली गाउँपालिका– ३ इलाम घर भइ दमक नगरपालिका– ५ मा डेरागरी बस्दै आएका २६ वर्षीय अगम राई र कमल गाउँपालिका– ५ का ३६ वर्षीय जीवन लिम्बूलाई ५ ग्राम ब्राउनसुगर र नगद २९ हजार ४५० रुपैयाँसहित पक्राउ गरेको हो ।

लागूऔषध नियन्त्रण ब्युरो काँकरभिट्टाबाट खटिएको प्रहरी टोलीले मेचीनगर नगरपालिका– ९ का २६ वर्षीय अजय धिमाललाई १ ग्राम ब्राउनसुगर र मेची पुल बिटबाट खटिएको प्रहरी टोलीले भद्रपुर नगरपालिका– ५ बाट ५५० मिलिग्राम ब्राउनसुगरसहित इलाम चुलाचुली– ३ का २८ वर्षीय विवेक राईलाई पक्राउ गरेको हो ।

मोरङबाट लागूऔषधसहित ४ जनालाई प्रहरीले पक्राउ गरेको छ ।

मोरङको पथरी शनिश्चरे नगरपालिका– १० स्थितमा इलाका प्रहरी कार्यालय पथरीबाट खटिएको प्रहरी टोलीले चेकजाँचको क्रममा बीआर ३८ डी ७८८९ नम्बरको मोटरसाइकल चालक रङ्गेली नगरपालिका– ७ का २४ वर्षीय अबय शाह र सुनवर्सी नगरपालिका– ७ का १९ वर्षीय हयात अलीलाई ७ ग्राम १७ मिलिग्राम ब्राउनसुगर सहित पक्राउ गरेको छ । त्यस्तै कानेपोखरी गाउँपालिका– २ बाट बीआर ३८ एबी ४१३५ नम्बरको मोटरसाइकल चालक भारत अररियाका २१ वर्षीय मोहम्मद इसराख गमिरलाई ४ ग्राम ९५ मिलिग्राम ब्राउनसगुरसहित पक्राउ गरेको हो ।  इलाका प्रहरी कार्यालय लेटाङले लेटाङ नगरपालिका– ९ बाट स्थानीय २७ वर्षीय विशाल राई ८३ मिलिग्राम ब्राउनसुगरसहित पक्राउ गरेकाे छ ।