विराटनगर विद्यालय नाटक महोत्सव भदाैमा

विराटनगर । विराटनगरमा विद्यालय नाटक महोत्सव गरिने भएको छ । आरोहण गुरुकुल विराटनगरले गर्ने महोत्सव २२ भदौदेखि १० दिनसम्म सञ्चालन हुनेछ ।

चौथो संस्करणको  महोत्सवमा विद्यालयको सहभागिताका लागि गुरुकुलले आह्वान पनि गरेको छ । विराटनगर र आसपासका विद्यालयले साउन ३२ गतेभित्रमा आवेदन दिन सक्नेछन् ।

आवेदन मध्येबाट नौवटा विद्यालय छनोट हुनेछन् । विद्यालयलाई गुरुकुल नै निःशुल्क प्रशिक्षण र प्राविधिक सहयोग दिएर नाटक सिकाउनेछ । नाटक गुरुकुलको नाटकघरमा पञ्चन हुनेछ ।

पाठ्यक्रममा भएको वा शिक्षक तथा विद्यार्थीले लेखेको एक घण्टा अवधि हाराहारीको नाटकमा  विद्यार्थीले नै अभिनय गरी मञ्चन गर्नुपर्ने हुन्छ ।

नौ विद्यालय र आयोजकको एउटासमेत गरी १० नाटक मञ्चन हुने यो महोत्सव विद्यार्थीलाई रंगमञ्चसँग जोड्ने उत्सव भएको आयोजक आरोहण विराटनगरका अध्यक्ष भैरव क्षेत्रीले बताए । यसअघिको तीन संस्करण सफल भएका कारण चौथो पटक महोत्सव आयोजना गर्न लागेको उनले बताए ।