टिपर र बसले मोटरसाइकललाई ठक्कर दिदा बुबाको मृत्यु, छोरा घाइते

विराटनगर । मोरङको सुन्दरहरैँचा नगरपालिका–१० खोर्सानेमा बस र टिपरले मोटरसाइकललाई ठक्कर दिदा एक जनाको मृत्यु भएको छ । एक घाइते भएका छन् ।

सुरुमा बससँग मोटरसाइकल ठोक्किएको थियो, पछाडिबाट आउँदै गरेको टिपरले पनि ठक्कर दिएको थियो ।

सडकमा गुडिरहेको प्रदेश १–०२–००१ ख ९८८३ नम्बरको बसको पछाडि बाबु–छोरा सवार मोटरसाइकल दिउँसो ४ः४५ बजेतिर ठोक्किएको प्रहरीले जनाएको छ । बसले अचानक ब्रेक लगाउँदा ठोक्किन पुगेको प्रदेश १–०२–०४२ प ८१७२ नम्बरको मोटरसाइकललाई पछाडिबाट टिपरले ठक्कर दिएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए ।

उनका अनुसार मोटरसाइकललाई ना १ क ६१६७ नम्बरको टिपरले ठक्कर दिँदा मोटरसाइकल चालक केराबारी गाउँपालिका–९ का २२ वर्षीय रञ्जित मगर र पछाडि सवार उनका बुवा ६९ वर्षीय रामबहादुर मगर घाइते भएका थिए ।

दुवै जना घाइतेलाई उपचारका लागि विराटनगरको नोबेल शिक्षण अस्पताल ल्याइएको थियो । गम्भीर अवस्थाका रामबहादुरलाई अस्पताल ल्याइपुर्याउनसाथ चिकित्सकले मृत घोषित गरेको डीएसपी बस्नेतले बताए ।

दुर्घटनामा परेर घाइते भएका रञ्जितको उपचार जारी छ । शरीरका विभिन्न भागमा चोट लागेका उनको अवस्था मध्यम रहेको जानकारी प्रहरीले दिएको छ ।

मोटरसाइकल, टिपर, बस र बसका चालक उर्लाबारी नगरपालिका–४ का ५० वर्षीय राजकुमार विकलाई प्रहरीले नियन्त्रणमा लिएको छ ।