योजना बैङ्क मार्फत योजना छान्छौ ,बजेटको विकृति हटाउँछौ : मुख्यमन्त्री कार्की 

विराटनगर । कोशी प्रदेशका मुख्यमन्त्री हिक्मतकुमार कार्कीले प्रदेश योजना बैङ्क मार्फत बजेटमा योजनाहरू समावेश गर्ने बताएका छन् । योजना एकतिर बजेट अर्को तिर हुने परिपाटी भएकाले यसको अन्त्य गर्न योजना बैंक मार्फत बजेटमा योजना समावेश गर्ने बताएका हुन् ।

प्रदेश योजना आयोगले शुक्रबार विराटनगरमा आयोजना गरेको प्रदेशको समग्र आर्थिक विकास तथा लगानीको वातावरणमा सुधारका क्षेत्रमा अनुभव सिकाइ आदान प्रदान कार्यक्रममा बोल्दै कार्कीले योजनालाई नागरिकको पक्षमा कार्यान्वयन गर्ने बताए ।

‘हामीले योजना एकातिर र बजेट अर्को तिर हुने परिपाटी अन्त्य गर्न योजना बैक कसरी बनाउने र कसरी कार्यान्वयनमा लैजाने भन्ने छलफल गरिरहेका छौ,’ उनले भने,‘ अगामी दिनमा त्यस्तो हुन दिन्नौँ ।’ प्रदेशमा विकासको गतिलाई तीव्रता दिन राष्ट्रिय पूँजीको विकास आवश्यक रहेको बताए ।

मुख्यमन्त्री कार्कीले मुलुकको व्यापार घाटा कम गर्न कृषि, पशुपालनको उत्पादन वृद्धि र जलविद्युतको निर्यात जरुरी रहेकाे बताए ।