कक्षा १२ को परीक्षामा ५२.९१ प्रतिशत विद्यार्थी पास

काठमाडौं । कक्षा १२ को परीक्षामा ५२.९१ प्रतिशत विद्यार्थी उत्तीर्ण भएका छन् ।

शुक्रबार प्रकाशित नतिजा अनुसार परीक्षामा सहभागी भएका नियमिततर्फका ३ लाख ९० हजार ८ सय ६८ परीक्षार्थीमध्ये २ लाख ३ हजार ८ सय ४७ विद्यार्थी अर्थात् ५२.९१ प्रतिशत मात्रै उत्तीर्ण भएका हुन् ।

राष्ट्रिय परीक्षा बोर्डका अनुसार कुल विद्यार्थीमध्ये एक सय २२ विद्यार्थीको नतिजा रद्द भएको छ । परीक्षाफल अनुसार १ लाख ८७ हजार विद्यार्थी ननग्रेडेड (एनजी) भएका छन् ।

२.८१ देखि ३.२० जीपीए प्राप्त गर्ने विद्यार्थीको संख्या ७८ हजार ७५ रहेको परीक्षा बोर्डले जनाएको छ । २.४१ देखि २.८० जीपीए प्राप्त गर्ने विद्यार्थीको संख्या ६१ हजार ३६ रहेको छ । ३.२१ देखि ३.६० जीपीए प्राप्त गर्नेको संख्या ४६ हजार ८ सय ९३ छ । ३.६१ देखि ४ जीपीए ल्याउने विद्यार्थीको संख्या ९ हजार ५ सय ९१ छ ।