ह्याप्पी छन् ह्याप्पीकुमार पासवान

विराटनगर । विराटनगर महानगरपालिका– १६  दरैयाका ह्याप्पीकुमार पासवानले १६ वर्ष भाडामा अरुको रिक्सा चलाए । उनले दैनिक १५ रुपैयाँका दरले रिक्सा भाडामा कुदाउन सुरु गरेका थिए । आम्दानीले परिवारको गुजारा मुस्किलले चल्यो ।

बजारमा सिटी सफारी आएपछि रिक्सा चल्न छाड्यो, रिक्सा छाडेर ह्याप्पीले फेरि सिटी सफारी भाडामा लिए । दैनिक सात सय रुपैयाँ भाडा तिरेर उनले आठ वर्ष विराटनगरमा सिटी सफारी चलाए ।

सिटी धनीलाई दिनको सात सय रुपैयाँ भाडा तिरेर उनले दैनिक ६–७ सय रुपैयाँ कमाए ।  सफारीको आम्दानीले छोराछोरीको पढाई खर्च र घर खर्च गरे ।  

अढाई दुई वर्षयता उनले आफ्नै सफारी चलाइरहेका छन् । जीवन विकास लघुवित्त वित्तीय संस्थाले सिटी रिक्सा किनेर दिएपछि उनले आफ्नै सफारी चलाउन थालेका हुन् । सिटी धनीलाई दिनुपर्ने मासिक २१ हजार जोगिएको छ । घरधन्दा पनि राम्रै चलेको छ । सिटी पनि आफ्नै भएको छ । 

आर्थिक अवस्था कमजोर भएका पासवानलाई लघुवित्तले दुई लाख ६५ हजारमा  ऋणमा रिक्सा उपलब्ध गराएको थियो । रिक्साको किस्ता उनले आम्दानीबाट मासिक रुपमा तिरिरहेका छन् ।

‘१६ वर्ष रिक्सा भाडामा चलाए, त्यसपछि सिटी सफारी चलाए,’ पासवान भन्छन्,‘ हिजो आफूसँग नहुँदा भाडामा चलाए, जीवन विकासले मलाई सफारीको मालिक बनाइदियो, म खुसी छु, परिवार पनि खुसी छ ।’ 

भाडामा रिक्सा चलाउँदा उनले आफ्नो किन्ने आट गरेका थिएनन् । आम्दानीको आधा हिस्सा सिटी धनीलाई दिनुपर्ने भएकाले उनले बचत गर्न पनि सकेनन् । जीवन विकास लघुवित्तमा उनकी श्रीमती पानोदेवी सदस्य छिन । श्रीमती मार्फत उनले रिक्सा कुदाउन पाए । ‘हिजो साहुलाई पैसा बुझाउँथे, अहिले त्यो पैसा जोगियो, बचत गर्छु ’ उनले भने,‘ थाेरै थाेरै किस्ता तिरे, यो गाडी पनि आफ्नै भयो ।’

सिटी सफारी कै कमाईले उनले छोरालाई इन्जिनियरिङ पढाइरहेका छन् । पाँच जनाको परिवारको गुजारा सहज रुपमा भइरहेको छ ।