जबरजस्ती करणी मुद्दाका कैदी कोशी अस्पतालबाट भागे

विराटनगर । जबरजस्ती करणी मुद्दाका कैदी विराटनगरको कोशी अस्पतालबाट फरार भएका छन् । जिल्ला कारागार मोरङमा कैद सजाय भुक्तान गरिरहेका २४ वर्षीय आर्यन मोहमद अहमद खान भनिने मोहमद अहमद फरार भएका हुन् ।

कारागारका निमित्त जेलर तुलसी पौडेलका अनुसार पेट दुख्ने समस्याका कारण बिरामी परेका अहमदलाई मंगलबार उपचारका लागि कोशी अस्पताल भर्ना गरिएको थियो । बिहीबार बिहान ५ः१५ बजेतिर फरार भएका हुन् ।

विराटनगर महानगरपालिका–८ घर भएका अहमद जबरजस्ती करणी मुद्दामा दोषी ठहर भएका कैदी हुन् ।

अस्पताल निगरानीमा खटाइएका प्रहरीलाई धकेलेर लडाउँदै उनी फरार भएको प्रहरीले बताएको छ । अहमदको निगरानीका लागि कारागारले प्रहरी सहायक हवल्दार राजीव राजभण्डारी र जवान ज्ञानेन्द्रबहादुर कटवाललाई खटाएको थियो ।

शौचालय जाने बहानामा प्रहरीलाई धकेलेर फरार भएका कैदीको खोजी भइरहेको मोरङ प्रहरी प्रमुख एसपी नवराज कार्कीले बताए । भारततर्फ भाग्नसक्ने सम्भावनालाई मध्यनजर गरेर नेपाल–भारत सीमा क्षेत्रमा निगरानी उच्च बनाएको छ ।

घटनाको अनुसन्धान सुरु गरिएको जानकारी मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले दिए । प्रहरीको लापरबाही देखिए कारबाही हुने उनको भनाइ छ । बस्नेतका अनुसार शौचालन जाने क्रममा निगरानीमा खटिएका प्रहरीलाई धकेलेर लडाएको र त्यही मौकामा कैदी फरार भएको प्रारम्भिक अनुसन्धानबाट खुलेको छ ।

जबरजस्ती करणी मुद्दामा दोषी ठहर भएका अहमदले करिब डेढ वर्षदेखि मोरङ कारागारमा सजाय भुक्तान गरिरहेका थिए । जिल्ला अदालत मोरङले २०७९ फागुन २९ गते उनलाई १२ वर्ष कैद र ५ लाख जरिवानाको फैसला गरेको पाइएको छ । त्यस्तै, पीडक अहमदबाट पीडितलाई १ लाख क्षतिपूर्ति भराउने र पीडित राहत कोषमा २० हजार रूपैयाँ जम्मा गर्नुपर्ने फैसला पनि अदालतले गरेको थियो ।

अहमदले अदालतको फैसला अनुसार २०९१ साल फागुन ३ गतेसम्म कारागारभित्र बस्नुपर्ने हुन्थ्यो । कारागारमा हाल ४ जना नाबालक र ९५ महिलासहित १ हजार १६ जना कैदीबन्दी छन् ।