दुहवीबाट हराएकी नाबालिकाको विराटनगरबाट उद्धार, ३ जना पक्राउ

विराटनगर । सुनसरीको दुहवीबाट हराएकी एक नाबालिकालाई विराटनगरमा बन्धक बनाएर राखिएको अवस्थामा भोलिपल्ट फेला भेटिएको छ ।

बन्धक बनाएर राखेको ठाउँबाट प्रहरीले नाबालिकालाई बुधबार बिहान सकुशल उद्धार गरेको छ । बन्धक बनाएर राख्ने ३ जनालाई प्रहरीले पक्राउ गरेको छ । दुहवी नगरपालिका–१० डुम्राहाकी ६ वर्षीया नाबालिका मंगलबार दिउँसो ३ बजेतिर हराएकी थिइन् । मामाघरमा खेलिरहेका बेला बालिका बेपत्ता भएको जानकारी अभिभावकले इलाका प्रहरी कार्यालय दुहवीमा गराएका थिए ।

त्यसलगत्तै इन्सपेक्टर मोहन पोखरेल नेतृत्वको टोलीले खोजी तीव्र पारेको थियो । सुनसरी प्रहरीका प्रवक्ता डीएसपी नवीनकृष्ण भण्डारीका अनुसार विराटनगर महानगरपालिका–६ का ५० वर्षीय सञ्जय पासवानले खेलिरहेको अवस्थामा नाबालिकालाई उठाएर अभिभावकको मञ्जुरी बिना नै लिएर गएको प्रारम्भिक अनुसन्धानबाट खुलेको छ ।

सञ्जयले अभिभावकको अनुमति नलिइकन दुहवीबाट नाबालिकालाई ल्याएर विराटनगर–१० स्थित आफन्तको डेरामा बन्धक बनाएर राखेको जानकारी भण्डारीले दिए । विराटनगर–१० मा सञ्जयका आफन्त ५० वर्षीय कलानन्द पासवान र ४० वर्षीया सरिता पासवान डेरा बस्छन् । डेरा बसेकै कोठामा बालिकालाई रातभर बन्धक बनाएर राखिएको प्रहरीले जनाएको छ ।

इप्रका दुहवी, जिल्ला प्रहरी कार्यालय मोरङ र प्रदेश प्रहरी कार्यालय विराटनगरको संयुक्त टोलीले बुधबार बिहान ६ बजेतिर बालिकालाई फेला पारेर सकुशल उद्धार गरेको डीएसपी भण्डारीको भनाइ छ । उनका अनुसार सञ्जयका आफन्त डेरा बसेकै कोठाबाट नाबालिकालाई उद्धार गरिएको हो ।

अभिभावक र आफन्त कोही कसैलाई पनि नसोधिकन नाबालिकालाई सञ्जयले लगेका थिए । नाबालिकाकी ठूलीआमा र सञ्जयबीच प्रेम सम्बन्ध रहेको प्रहरीले जनाएको छ । प्रहरी स्रोतका अनुसार नाबालिकाकी ठूलीआमा वैदेशिक रोजगारीका लागि जानलाई काठमाडौंमा गएकी थिइन् । उनलाई विदेश जानबाट रोक्नका लागि ‘बार्गेनिङ’ गर्न सञ्जयले नाबालिकालाई लिएर गएको पाइएको प्रहरीको भनाइ छ ।

नाबालिकालाई लिएर गएपछि सञ्जयले पीडिताका मामालाई फोन गरेका थिए । ‘तेरो भान्जी मेरो कब्जामा छ । दिदीलाई घर बोलाउने भए फिर्ता ल्याइदिन्छु । होइन भने अरुलाई नै दिन्छु’ भनेर सञ्जयले नाबालिकाको मामालाई फोन गरेको प्रहरीले जनाएको छ । नाबालिकाकी ठूलीआमालाई विदेश जान नदिने र आफूसँगै राख्ने योजना बनाएर सञ्जयले नाबालिकालाई आफ्नो कब्जामा लिएको प्रहरीको भनाइ छ ।

प्रहरीले नाबालिकाको उद्धार गर्नुका साथै उनलाई कब्जामा लिने सञ्जयसहित उनका आफन्तहरु कलानन्द र सरितालाई पक्राउ गरेको छ । पक्राउ परेकाविरुद्ध अपहरण तथा शरीर बन्धक मुद्दा चलाउने प्रहरीको तयारी छ । उनीहरुविरुद्ध अदालतबाट बुधबार ५ दिनको म्याद थप गरेर अनुसन्धानको बाँकी प्रक्रिया अघि बढाइएको डीएसपी भण्डारीले बताए । इलाका प्रहरी कार्यालय दुहवीका इन्सपेक्टर मोहन पोखरेल नेतृत्वको टोलीले घटनाको विस्तृत अनुसन्धान अघि बढाएको छ ।