राष्ट्रपतिबाट माफी पाएका सुभाष तामाङ : जेलबाट छुटेपछि अर्को हत्या

विराटनगर । कर्तब्य ज्यान मुद्दामा सरकारको सिफारिसमा राष्ट्रपतिबाट आधा सजाय माफी पाएका उर्लाबारी नगरपालिका–५ का ३५ वर्षीय सुभाष तामाङ हत्या आरोपमा पुन पक्राउ परेका छन् । मंगलबार राति मोरङको उर्लाबारीमा २४ वर्षीय कुशल दाहालको हत्या आरोपमा तामाङ पक्राउ परेका हुन् । उर्लाबारी ४ का दाहाललाई आफ्नै घरमा लगेर तामाङले छुरा प्रहार गरेका थिए ।

तामाङ दश वर्षअघि पनि साथीको हत्या आरोपमा पक्राउ परेका थिए । कर्तब्य ज्यान मुद्दामा दोषी ठहर भएका उनी पाँच वर्ष मै माफी पाएर छुटेका थिए । त्यसपछि पून अपराधिक घटनामा सक्रिय भए । कर्तब्य ज्यान मुद्दाको सजाय भुक्तानपछि छुटेका उनी ज्यान मार्ने उद्योग, लागूऔषध करोबार र अभद्र व्यवहार कसूरमा पून कारागार परे ।

मोरङ प्रहरी उपरीक्षक नवराज कार्कीका अनुसार ८ असोज २०७१ मा साथीको हत्या गरेपछि पक्राउ परेका तामाङलाई १० वर्ष कैद सजाय भएपनि २०७६ सालमा गणतन्त्र दिवसमा छुटेको देखिन्छ । त्यसको एक वर्ष नबित्दै उनी ज्यान मार्ने उद्योगमा मुछिए । ८ भदौ २०७७ मा उनलाई जिल्ला अदालतबाट दुई वर्ष ६ महिना कैद सजाय भयो । सोही वर्ष ब्राउन सुगर कारोबारको कसुरमा तीन महिना कैद सजाय भएको थियो । ब्राउन सुगरको फैसला हुँदा उनी ज्यान मार्ने उद्योगको मुद्दामा सजाय काटिरहेका थिए ।

सजय भुक्तानपछि छुटेका उनी २४ असोज २०८० मा जिल्ला अदालतको आदेशपछि धरौटी बुझाउन नसकेर कारागार चलान भए । भोलिपल्ट एक लाख धरौटी बुझाएर छुटेका थिए ।

मंगलबार आफ्नै घरमा आएका कुशलको हत्यापछि फरार भएका उनी बुधबार दिउँसो पक्राउ परेको प्रहरी उपरीक्षक कार्कीले बताए ।

दाहालको मंगलबार साँझ हत्यापछि फरार तामाङलाई बस चढेर भाग्दै गर्दा सुन्दरहरैँचा नगरपालिका–४ दुलारीबाट प्रहरीले पक्राउ गरेको हो । उनीविरुद्ध कर्तव्य ज्यान मुद्दा चलाउने प्रहरीको तयारी छ ।

प्रहरीका अनुसार तामाङले लाट्ठी र खुकुरी प्रहार गरेर दाहालको हत्या गरेका थिए । तामाङले अन्य युवाहरुको सहयोग लिएर दाहाल र उर्लाबारी–४ कै ३१ वर्षीय सञ्जय आचार्यलाई साँझ ६ बजेतिर आफ्नो घरमा लगेका थिए ।

उर्लाबारी–५ स्थित उद्योग वाणिज्य संघको कार्यालयनजिक रहेको घरमा उनी एक्लै बस्थे । घरमा पुगेपछि मोबाइल चोरेको आरोपमा आक्रमण गर्दै छुरा प्रहार गरेका थिए । प्रहरीले तामाङसँगै रहेका अन्य स्थानीय युवाहरुको पनि खोजी गरिरहेको छ ।

तामाङको आक्रमणबाट गम्भीर घाइते भएका दाहाललाई आचार्यले नै सीटी सफारीमा राखेर उपचारका लागि उर्लाबारीको गोदावरी अस्पताल पुर्याएका थिए । त्यहाँ सम्भव नभएपछि थप उपचारका लागि झापा बिर्तामोडको बी एन्ड सी अस्पताल लगियो । बिर्तामोडमा उपचारका क्रममा मृत्यु भएको थियो ।

पटके अपराधि

प्रहरीका अनुसार तामाङ पटके अपराधी हुन् । कर्तव्य ज्यान मुद्दामा दोषी ठहर भएर कैद भुक्तान गरेपछि छुटेका उनी पटक पटक अपराधिक घटनामा मुछिएका थिए । ८ असोज २०७१ मा उनले आफ्नै घर अगाडि उर्लाबारी–२ का नवीन राईको हत्या गरेका थिए । सो मुद्दामा जिल्ला अदालत मोरङले तामाङलाई दोषी ठहर गर्दै सर्वस्वसहित जन्मकैदको सजाय सुनाएको थियो ।

तर तत्कालीन जिल्ला न्यायाधीश ऋषिराम निरौलाको इजलासले २७ माघ २०७१ मा गरेको फैसला उच्च अदालत विराटनगरले उल्टाइदियो । उच्च अदालत विराटनगरका तत्कालीन न्यायाधीश कुमारप्रसाद पोखरेल र शिवराज अधिकारीको संयुक्त इजलासले २९ भदौ २०७३ मा तामाङलाई १० वर्ष कैद सजाय हुने फैसला गरेको थियो । १० जेठ २०७५ मा सर्वाेच्चले उच्चको फैसला सदर गरेको थियो ।

जिल्लाको फैसला उल्टिएर तीन तहको अदालतबाट मुद्दा किनारा लागेपछि २०७६ सालमा गणतन्त्र दिवसमा उनले आधा सजाय (पाँच वर्ष) माफी मिनाहा पाएका थिए । त्यसपछि पनि पटक पटकको घटनामा पक्राउ परेका उनी पटके अपराधि रहेको प्रहरीले बताएको छ ।