उर्लाबारीका कुशलको हत्या आराेपमा सुभाष तामाङ पक्राउ

विराटनगर । मोरङको उर्लाबारी नगरपालिका–४ का २१ वर्षीय कुशल दाहालको हत्यामा संलग्नलाई प्रहरीले बुधबार दिउँसो पक्राउ गरेको छ । हत्यामा संलग्न उर्लाबारी–५ का ३५ वर्षीय सुभाष तामाङलाई प्रहरीले मोरङको सुन्दरहरैँचा नगरपालिका–४ दुलारीबाट पक्राउ गरेको हो ।

दाहालको हत्या गरेर तामाङ फरार बनेपछि प्रहरीले सार्वजनिक सवारीसाधन चेकजाँचमा कडाइ गरेको थियो । को १ ख ६४७१ नम्बरको बसमा चढेर धरानतर्फ जाँदै गरेको अवस्थामा तामाङलाई पक्राउ गरिएको मोरङ प्रहरी प्रमुख एसपी नवराज कार्कीले बताए ।

उनका अनुसार ट्राफिक प्रहरीले चेकजाँच गर्ने क्रममा बसभित्र भेटिएपछि तामाङलाई पक्राउ गरिएको हो । ट्राफिक प्रहरी पोस्ट गछियाका असइ किशोर निरौला नेतृत्वको टोलीले पक्राउ गरेर तामाङलाई इलाका प्रहरी कार्यालय बेलबारीको जिम्मा लगाएको छ । उनीविरुद्ध कर्तव्य ज्यान मुद्दा चलाउने प्रहरीको तयारी छ ।

प्रहरीका अनुसार तामाङले लाट्ठी र खुकुरी प्रहार गरेर मंगलबार साँझ दाहालको हत्या गरेका हुन् । तामाङले अन्य युवाहरुको सहयोग लिएर दाहाल र उर्लाबारी–४ कै ३१ वर्षीय सञ्जय आचार्यलाई साँझ ६ बजेतिर उर्लाबारी–५ स्थित उद्योग वाणिज्य संघको कार्यालयनजिक रहेको आफ्नो घरमा लगेका थिए । घरमै पुुर्याएर दाहालको हत्या गरेको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए ।

प्रहरीका अनुसार उर्लाबारी–५ का अन्दाजी २५ वर्षीय करण लिम्बू, उर्लाबारी–६ का अन्दाजी ३० वर्षीय रिजन आलेमगर र उर्लाबारी–७ का अन्दाजी २८ वर्षीय आङसुहाङ देवानले दाहाल र आचार्यलाई तामाङको घरसम्म पुर्याउन मद्धत गरेको प्रारम्भिक अनुसन्धानबाट खुलेको हो । तर, हत्यामा उनीहरुको संलग्नता यकिन भइसकेको छैन । फरार रहेका उनीहरुको खोजी भइरहेको बस्नेतले बताए ।

प्रहरीको प्रारम्भिक अनुसन्धानबाट हत्यामा लिम्बू, आलेमगर र देवानको प्रत्यक्ष संलग्नता देखिँदैन । तामाङको घरसम्म लैजान सहयोगीको भूमिका चैं निर्वाह गरेको खुल्यो । घटनापछि आचार्यलाई नियन्त्रणमा लिएर प्रहरीले सोधपुछ गरेको थियो । आचार्यलाई उद्रित गर्दै प्रहरीले दिएको जानकारी अनुसार दाहालमाथि तामाङले मात्रै लाट्ठी र खुकुरी प्रहार गरेको खुलेको छ ।

घरमा तामाङ एक्लै बस्दै आएको प्रहरीको भनाइ छ । दाहालको हत्या भएलगत्तै मोरङ प्रहरी प्रमुख एसपी नवराज कार्की आफैं घटनास्थल पुगेका थिए । प्रहरीका अनुसार तामाङले आफ्नो मोबाइल चोरी गरेको आरोप दाहालमाथि लगाएका थिए ।

त्यही विषयमा विवाद हुँदा दाहालको हत्या भएको डीएसपी बस्नेतले बताए । त्यस क्रममा तामाङले आचार्यलाई समेत लाट्ठीले हानेको खुलेको छ । आचार्यले भने तामाङसँग केही दिनअघि १ हजार रूपैयाँ सापटी लिएर फिर्ता नगरेको प्रारम्भिक अनुसन्धानबाट खुलेको छ ।