प्रहरी हिरासतमा थुनुवाको मृत्यु

विराटनगर । इलाका प्रहरी कार्यालय काँकडभिट्टा झापाको हिरासतमा रहेको एक युवकको मृत्यु भएको छ ।

इलाका प्रहरी कार्यालय काँकडभिट्टाको हिरासतमा रहेका मेचीनगर नगरपालिका वडा नम्बर ६ घर भई वडा नम्बर ७ मा बस्दै आएका २८ वर्षीय झकबहादुर खड्काको मृत्यु भएको हो ।

उनलाई प्रहरीले लागूऔषध खैरो हिरोइनसहित प्रहरीले नियन्त्रणमा लिएको थियो ।

१३ साउनमा ५ ग्राम खैरो हिरोइनसहित पक्राउ खड्कामाथि प्रहरीले अनुसन्धानका लागि पाँच दिन म्याद थपेको थियो ।

मंगलबार राति करिब साढे १ बजे अचानक गम्भीर विरामी भएका खड्कालाई उपचारका लागि आम्दा अस्पताल धुलाबारी लगिएको थियो ।

अस्पतालमा उपचारको क्रममा उनको मृत्यु भएको जिल्ला प्रहरी कार्यालय झापाका डिएसपी कृष्णकुमार चन्दले जानकारी दिए ।

खड्काको मृत्युको कारण खुलेको छैन । उनका अनुसार पोष्टमार्टम गरिएपनि रिपोर्ट आइसकेको छैन । हिरासतमा थुनुवाको मृत्यु भएको घटनाको विषयमा अनुसन्धान भइरहेको उनले जानकारी दिए ।