युवक हत्या प्रकरण : तीन महिनाअघि मात्रै कारागारबाट छुटेका थिए आरोपी

विराटनगर । मोरङको उर्लाबारीमा एक युवकको हत्या आरोपी केही महिनाअघि मात्रै कारागारबाट छुटेको खुलेको छ । मंगलबार राति उर्लाबारी  नगरपालिका– ५ मा २१ वर्षीय कुशल दाहालको छुरा प्रहार गरी हत्या भएको थियो । दाहाल उर्लाबारी ४ का बासिन्दा हुन् ।

उनीमाथि उर्लाबारी– ५  स्थित उद्योग वाणिज्य संघको कार्यालय नजिकै सुवास तामाङको घरमा छुरा प्रहार भएको थियो। प्रहरीका अनुसार तामाङले नै दाहाललाई छुरा प्रहार गरेका हुन्। छुरा प्रहारपछि उनी फरार छन् ।

मंगलबार बेलुका छुरा प्रहारबाट गम्भीर घाइते दाहाललाई उर्लाबारीको गोदाबारी अस्पताल भर्ना गरिएको थियो । त्यहाँ उपचार सम्भव नभएपछि लाइफलाईन अस्पताल दमक पठाइएको थियो । लाइफलाइनबाट उनलाई बिर्तामोडस्थित बी एन्ड सी अस्पतालमा भर्ना गरिएको थियो । उपचारका क्रममा राति ९ बजे उनको मृत्यु भएको थियो ।

मोरङ प्रहरी उपरीक्षक नवराज कार्कीका अनुसार प्रारम्भिक अनुसन्धानका क्रममा तामाङले नै छुरा प्रहार गरेको देखिएको छ । उनका अनुसार अपराधिक पृष्टभूमिका तामाङले २०७१ सालमा साथीको ढुंगाले हानेर हत्या गरेका थिए । उर्लाबारी २ का नवीन राईको हत्यामा संलग्न भएको देखिएपछि  तामाङ १० वर्ष कैद सजाय  भुक्तान गरेर करिब तीन महिना अघि मात्रै छुटेका थिए ।

मंगलबार बेलुका साढे ६ बजे आफ्नै घरमा आएका  दाहालमाथि छुरा प्रहार गरेका तामाङले ८ असोज २०७१ राति घर नजिकै बाटोमा राईलाई ढुंगाले हानेर हत्या गरेका थिए ।

तामाङले राईको हत्या गर्दा मोरङका प्रहरी उपरीक्षक कार्की इलाका प्रहरी कार्यालय उर्लाबारीको इञ्चार्ज (प्रहरी निरीक्षक) थिए । कार्कीले नै गरेको अनुसन्धानका आधारमा तामाङमाथि कर्तव्य ज्यान मुद्दा चलेको थियो । ‘त्यसबेला मैले नै अनुसन्धान गरी कर्तव्य ज्यान मुद्दा चलाएको थिए, कैद भुक्तान गरी ३–४ महिना अघि मात्रै छुटेको रहेछ,’ प्रहरी उपरीक्षक कार्कीले भने,‘ यो घटनापछि उनी फरार छन्, खोजी जारी छ ।’

तामाङ घरमा एक्लै बस्दै आएका थिए । मंगलबार दाहालसँगै अन्य युवकपनि उनको घरमा पुगेका थिए । सामान्य विवादमा छुरा प्रहार भएको प्रहरीले बताएको छ । प्रहरीले दाहालसँगै तामाङको घरमा गएका युवकलाई नियन्त्रणमा लिएर अनुसन्धान गरिरहेको छ ।