भारतको केरलामा बाढीपहिरोमा परी १२३ जनाको मृत्यु, नेपाली पनि परेको आशङ्का

काठमाडौँ । भारतको केरला प्रदेशस्थित वायनाड जिल्लामा पहिरोमा परी मृत्यु हुनेको संख्या १२३ पुगेको छ । बीबीसी हिन्दीका अनुसार मृतकको संख्या १२३ पुगेको हो । घटनापछि ९० जना हराइरहेका छन् ।

केरलाकी स्वास्थ्यमन्त्री विना जोर्जका अनुसार मंगलबार बिहान गएको पहिरोमा परी कयौं घर, पसल र गाडीहरु पुरिएका थिए ।

वायनाडका गाउँ बाढीपहिरोबाट तहसनहस भएका छन् । खोज तथा उद्धार कार्य जारी रहेकाले मृतकको संख्या अझै बढ्नसक्ने अधिकारीहरुले बताएका छन् ।

केरलाका कृषि फर्महरुमा नेपालीहरुले पनि काम गर्दछन् । बाढीपहिरोमा नेपालीहरु परेको आशंका गरिएको छ ।

खोज तथा उद्धारमा सेना, नौसेना, वायु सेना, आपदा मोचन बल सहितका उद्धारकर्मीहरु परिचालन गरिएको छ ।

राष्ट्रपति द्रौपदी मुर्मू, प्रधानमन्त्री नरेन्द्र मोदी, कांग्रेस आई अध्यक्ष एवम् वायनाडका सांसद राहुल गान्धी लगायतले घटनाप्रति दुःख व्यक्त गरेका छन् ।