माेरङकाे उर्लाबारीमा युवकको हत्या

विराटनगर । मोरङको उर्लाबारीमा छुरा प्रहार गरी एक युवकको हत्या भएको छ ।

मंगलबार राति उर्लाबारी नगरपालिका– ४ का २१ वर्षीय कुशल दाहालको छुरा प्रहार गरी हत्या भएको हो ।

उनीमाथि उर्लाबारी– ५ का सुवास तामाङको घरमा छुरा प्रहार भएको थियो । गम्भीर घाइते दाहालको बिर्तामोडस्थित बी एन्ड सी अस्पतालमा उपचारका क्रममा ज्यान गएको हो ।

मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार घटनापछि तामाङ फरार छन् । उनले नै छुरा प्रहार गरेको आशंका छ ।

अपराधिक पृष्ठभूमिका तामाङ घरमा एक्लै बस्दै आएको प्रहरीले बताएको छ । फरार तामाङको खोजी जारी छ ।

तामाङ यसअघि पनि कर्तव्य ज्यान मुद्दामा कारागार परेका थिए । व्यक्ति हत्या अभियोगमा कैद सजाय भुक्तान गरेर केही दिनअघि मात्रै छुटेको प्रहरीले बताएको छ ।

हत्याको कारण खुलेको छैन । घटनामा संलग्न अरु पनि छन कि भन्ने विषयमा अनुसन्धान भइरहेको प्रहरीले बताएको छ ।