कृषिमा व्यक्तिगत अनुदान रोक्न प्रधानमन्त्रीको निर्देशन

काठमाडौं । कृषिमा दिइने व्यक्तिगत अनुदान रोक्न प्रधानमन्त्री केपी शर्मा ओलीले निर्देशन दिएका छन् ।

मंगलबार सिंहदरबारमा सचिवहरुलाई बोलाएर ओलीले यस्तो निर्देशन दिएका हुन् । उनले आर्थिक अनुशासन पालना गर्न र हिसाब किताब चुस्तदुरुस्त राख्न पनि निर्देशन दिएका छन् ।

सामूहिक अनुदानमा सरकार अलिक उदार नै हुने उनले बताए । ‘जस्तो मलखादमा अनुदान । सबै किसानलाई जाने अनुदान हो यो । त्यसकारण ठीक छ’, प्रधानमन्त्री ओलीले भने ।

तर व्यक्तिगत अनुदान भने रोक्नुपर्ने उनले बताए ।

‘गाई पाल्न एक करोड, सुँगर पाल्न एक करोड, भैंसी पाल्न एक करोड फलानालाई अनुदान’, खासगरी कृषि मन्त्रालयमा यस्तो खुब अनुदान हुने भन्दै प्रधानमन्त्री ओलीले भने, ‘यस्ता कुरा रोक्नुपर्छ, यो एकदमै स्टप गर्नुपर्छ ।’ सित्तै पैसा दियो भने त्यसले मान्छेलाई बिगार्ने उनको विश्लेषण छ ।