मन्त्री छान्न कांग्रेस कोशी प्रदेशले केन्द्रमा पठायो मापदण्ड

विराटनगर । कोशी प्रदेश सरकारमा सहभागी हुने मन्त्रीको नाम प्रदेश तहबाट टुङ्गो लगाउन नसकेपछि नेपाली कांग्रेस कोशी प्रदेश समितिले मन्त्री छान्नका लागि केन्द्रमा मापदण्ड पठाएको छ । सोमबार विराटनगरमा बसेको प्रदेश समिति बैठकले मापदण्ड बनाएर केन्द्रमा पठाएको हो ।

प्रदेश समितिले जातीयता, लैङ्गिकता, भौगोलिकता र कार्यक्षमताका आधारमा मन्त्री छान्ने मापदण्ड बनाएर केन्द्रमा पठाएको हो । अब केन्द्रले नाम दिएपछि प्रदेश सरकारमा कांग्रेस सहभागी हुनेछ ।

कोशी प्रदेशमा नेपाली कांग्रेसले ४ वटा मन्त्रालय पाएको छ । प्रदेशसभामा रहेका २९ मध्ये अधिकांश प्रदेश सभा सदस्यहरूले मन्त्रीमा दाबी गरेपछि प्रदेश समितिले मन्त्री बनाउनेको मापदण्ड बनाएर केन्द्रमा पठाएको हो ।

नेपाली कांग्रेस कोशी प्रदेशका महामन्त्री उमेश थापाले मन्त्रीको नाम छान्दा चार वटा आधार हेर्नका लागि केन्द्रमा पठाइएको बताए । सोमबारको बैठकले सरकारमा जाने औपचारिक निर्णय पनि गरेको उनले बताए ।