उर्लाबारीमा मोटरसाइकल दुर्घटना हुँदा एक जनाको मृत्यु

विराटनगर । मोरङको उर्लाबारी मोटरसाइकल दुर्घटना हुँदा एकजना युवकको मृत्यु भएको छ । एक गम्भीर घाइते भएका छन् ।

उर्लाबारी नगरपालिका–९ खोपीडाँडास्थित भित्री सडक खण्डमा आइतबार साँझ दक्षिणबाट उत्तरतर्फ जाँदै गरेको मे ९ प ५५७५ नम्बरको मोटरसाइकल आफैं अनियन्त्रित भएर साँझ ६ः३० बजेतिर दुर्घटना भएको थियो ।

मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार दुर्घटनामा मोटरसाइकलको पछाडि सवार झापाको दमक नगरपालिका–१० का अन्दाजी २२ वर्षीय धनराज रिजालको मृत्यु भएको हो ।

दुर्घटनामा मोटरसाइकल चालक दमक–१० का २२ वर्षीय रोशन भट्टराई र पछाडि सवार रिजाल गम्भीर घाइते भएका थिए । दुवै जनालाई उपचारका लागि उर्लाबारीस्थित अरनिको अस्पताल लगिएको थियो ।

उपचारका क्रममा रिजाललाई ७ः१५ बजेतिर चिकित्सकले मृत घोषित गरेको डीएसपी बस्नेतले बताए ।

गम्भीर घाइते भट्टराईलाई थप उपचारका लागि झापाको बिर्तामोडस्थित बी एन्ड सी अस्पतालमा उपचार भइरहेको छ । तीव्र गतिका कारण दुर्घटना भएको प्रहरीले जनाएको छ ।