विराटनगरमा विद्यार्थीमाथि निर्घात कुटपिट

विराटनगर । विद्यार्थीको एउटा समूहले आइतबार राति विराटनगरमा एकजना विद्यार्थीमाथि कुटपिट गरेको छ । ल क्याम्पस विराटनगरमा अध्ययनरत बाराको कलैया नगरपालिका–१३ घर २१ वर्षीय रवीन्द्रप्रसाद कुशवाहामाथि कुटपिट भएको हो । विराटनगर महानगरपालिका–१ मा डेरा बस्दै आएका थिए । कुटपिटबाट घाइते उनको नोबेल शिक्षण अस्पतालमा उपचार भइरहेको छ ।

मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार विराटनगर–१ स्थित ल क्याम्पसनजिक राति ९ः३५ बजेतिर घटना भएको हो । क्याम्पसमा अध्ययनरत अन्य विद्यार्थीले कुशवाहालाई कुटपिट गरेको उनले बताए ।

कुटपिट गर्ने समूहका एक जना पर्साको वीरगन्ज उपमहानगरपालिका–११ घर भएका २३ वर्षीय मिकलेश चौहानलाई प्रहरीले पक्राउ गरेको छ । अन्य फरार रहेकाले खोजी जारी राखिएको बस्नेतले बताए । उनका अनुसार घाइते हुने र घटनामा संलग्नहरु ल क्याम्पसमा अध्ययनरत विद्यार्थी हुन् ।