लघुवित्तको सेवा शुल्क घटाउन राष्ट्र बैङ्कको परिपत्र

विराटनगर । राष्ट्र बैंकले लघुवित्त वित्तीय संस्थाले कर्जा प्रवाह गर्दा लिने सेवा शुल्क घटाएको छ ।आइतबार लघुवित्त संस्थाका लागि जारी गरेको एकीकृत निर्देशिका संशोधन गर्दै सेवा शुल्क घटाएका हो ।

संशोधित निर्देशिका अनुसार अब ‘घ’ वर्गका लघुवित्तले कर्जा लगानी गर्दा स्वीकृत कर्जामा सेवा शुल्क बापत १.३ प्रतिशतसम्म मात्रै लिन पाउनेछन् । यसअघि सेवा शुल्क अधिकतम १.५ प्रतिशत थियो ।

एक वर्षभन्दा कम अवधिका लागि कर्जा प्रवाह गरेको अवस्थामा यस्तो कर्जामा पनि वार्षिक १.३ प्रतिशतमा नबढ्ने गरी कर्जा अवधिको आधारमा उक्त दरको दामासाही हिसाबले मात्र सेवा शुल्क लिन सक्ने व्यवस्था गरिएको छ । यसअघि यस्तो सेवा शुल्क पनि १.५ प्रतिशत नै थियो ।

कर्जा प्रवाह गर्दा स्वीकृत कर्जा रकमबाट तोकिएको सेवा शुल्कबाहेक अन्य कुनै पनि प्रकारको रकम कट्टा गरी बचतका रूपमा राख्न नपाउने निर्देशिकामा उल्लेख छ ।

राष्ट्र बैंकले क, ख र ग वर्गका बैंकसँग कारोबार गर्ने ऋणीले ‘घ’ वर्गका लघुवित्त सँग ऋणी लिन नपाउने प्रावधान पनि लागु गरेको छ । एक जना ऋणीले ‘घ’ वर्गका अधिकतम दुई वटा वित्तीय संस्थासँग मात्रै करोबार गर्न पाउने निर्देशिकामा उल्लेख छ ।