मिक्लाजुङमा मोटरसाइकल दुर्घटना: छोरीको मृत्यु, बाबु–आमा घाइते

विराटनगर । मोरङको मिक्लाजुङमा मोटरसाइकल दुर्घटना हुँदा बालिकाको मृत्यु भएको छ । बाबु र आमा घाइते भएका छन् । रमिते–टाँडी सडक खण्डअन्तर्गत मिक्लाजुङ गाउँपालिका–१ झण्डे डाँडामा शनिबार दिउँसो ३ बजेतिर दुर्घटना भएको हो ।

रमितेबाट उर्लाबारीतर्फ जाँदै गरेको बा २७ प १८३५ नम्बरको मोटरसाइकल दुर्घटना हुँदा बेलबारी नगरपालिका–१ घर भएकी १३ वर्षीया सुस्मिता धिमालको मृत्यु भएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले जानकारी दिए ।

प्रारम्भिक अनुसन्धानबाट तीव्र गतिमा रहेको मोटरसाइकल आफैं अनियन्त्रित भएर दुर्घटनामा परेको देखिएको उनले बताए ।

दुर्घटनामा मोटरसाइकलको पछाडि सवार सुस्मिता गम्भीर घाइते भएकी थिइन् । उपचारका लागि उर्लाबारीस्थित अरनिको अस्पताल पुर्याउनसाथ चिकित्सकले मृत घोषित गरिदिएका हुन् ।

मोटरसाइकल सुस्मिताका बुवा ३७ वर्षीय सुनील धिमालले चलाएका थिए । दुर्घटनामा सुस्मिताका बाबु सुनीलसहित मोटरसाइकलको पछाडि सवार आमा ३५ वर्षीया चन्द्रमाया धिमाल घाइते भएको डीएसपी बस्नेतले बताए । सुनील र चन्द्रमायाको अवस्था सामान्य छ । उनीहरुको उपचार जारी छ ।

दुर्घटनामा परेको मोटरसाइकल सडकबाट लगभग ७० मिटर तल झरेको प्रहरीले बताएको छ ।