दुवै हात नभएका गणेश प्रधानमन्त्रीको सचिवालयमा

काठमाडौँ । दुवै हात नभएका कर्मचारी गणेश राईलाई प्रधानमन्त्री केपी ओलीले आफ्नो सचिवालयमा राखेका छन् । यसअघि तीन पटक ओली प्रधानमन्त्री हुँदा खोटाङ काउलेका राई ओलीको सचिवालयमा थिए ।

चौथो पटक प्रधानमन्त्री पदको शपथग्रहण गरेर सिंहदरबार जाँदा राईलाई नभेटिएपछि ओलीले खोजी गरेर आफ्नो सचिवालयमा ल्याएका हुन् ।

पहिलो पटक प्रधानमन्त्री हुँदा २०७२ असोजमा राईलाई भेटेपछि आफ्नो सचिवालयमा राखेको ओलीले सामाजिक सञ्जाल फेसबुकमार्फत जनाएका छन् ।

‘खोटाङ काउलेका गणेश राईलाई मैले पहिलो पटक प्रधानमन्त्री हुँदा २०७२ असोजमा भेटेको थिएँ। दुवै हातको कुहिनो भन्दा तलको भाग नभए पनि उनले मेरो अगाडि नै कम्प्युटर चलाएर देखाएपछि आश्चर्य लागेको थियो। त्यसबेला कम्प्युटर अपरेटरका रूपमा उनको जागिर शुरू भयो। । दोस्रो पटक प्रधानमन्त्री हुँदा गणेश फेरि आए र करारमा काम गरे,’ प्रधानमन्त्री ओलीले भनेका छन्,‘यस पटक प्रधानमन्त्री पदको सपथग्रहण गरेर सिंहदरबार जाँदा उनी नभेटिएपछि मैले उनलाई खोजें। अहिले उनलाई बोलाएर सचिवालयकै सदस्यका रूपमा काम गर्ने जिम्मेवारी दिइएको छ। अब गणेश मसँगै काम गर्ने भएका छन् ।’