कोशीको भागबन्डाका लागि काठमाडौँमा सहमति 

विराटनगर । कोशी प्रदेशको सत्ता सहकार्यका लागि नेकपा एमाले र नेपाली कांग्रेसले काठमाडौँमा सहमति गरेका छन् । शनिबार काठमाडौँमा दुई दलको बैठकले मन्त्रालय र संसदीय समितिको भागबन्डा टुङ्गो लगाएको हो । प्रदेशको सरकारको सहकार्यका लागि दुई दलका नेता शुक्रबार नै काठमाडौँ पुगेका थिए ।

नेकपा एमाले प्रमुख सचेतक रेवतीरमण भण्डारीका अनुसार एमालेले मुख्यमन्त्रीसहित पाँच र कांग्रेसले ४ वटा मन्त्रालय लिने सहमति भएको छ । मन्त्रालय भागबन्डा टुङ्गो लागेपछि सोमबार सरकार विस्तार गर्ने सहमति पनि भएको उनले बताए । ‘मोटामोटी सबै कुरामा छलफल भएर एकखालको सहमति भएको छ,’उनले भने,‘ कांग्रेस सोमबार सरकारमा सहभागी हुनेछ तयारी छ ।’

दुई दलको छलफलमा नेपाली कांग्रेसले सरकारको नेतृत्व पनि आलोपालो गर्नुपर्ने प्रस्ताव गरेको थियो । कांग्रेसको प्रस्तावमा छलफल भएपनि सहमति भएन  । आलोपालोको विषयमा केन्द्रको सहमति अनुसार अघि बढ्ने समझदारी बनेको छ ।

‘आलोपालोको विषय केन्द्रीय नेतृत्वको निर्णय अनुसार अघि बढ्ने सहमति छ,’ भण्डारीले भने,‘ बाँकी विषय विराटनगरमा छलफलपछि टुङ्गो लाग्छ ।’ भागबन्डाका लागि काठमाडौँमा भएको सहमति भने संयोग मात्रै रहेको उनी बताउँछन् । ‘ नेताहरु यतै आएको बेला सहमति भयो,’ उनले भने ।

कोशी प्रदेश सरकारमा माओवादी केन्द्रले सरकार छाडेपछि मुख्यमन्त्री कार्कीले आफू मातहत राखेको भौतिक पूर्वाधार विकास मन्त्रालय, स्वास्थ्य मन्त्रालय, पर्यटन वन तथा वातावरण मन्त्रालय कांग्रेसले पाउनेछ । त्यस्तै मुख्यमन्त्रीले आफूसँग राखेको उद्योग कृषि तथा सहकारी मन्त्रालय र एमालेका मन्त्री रहेको सामाजिक विकास मन्त्रालय मध्ये थप एउटा लिन प्रस्ताव गरेका छन् ।

कांग्रेसले भने खानेपानी सिँचाइ तथा उर्जा मन्त्रालयमा दाबी गरेको थियो । सो मन्त्रालय एमालेले नछाड्ने भएपछि  माओवादी  केन्द्रले छाडेका तीन मन्त्रालय र कृषि तथा सामाजिक मध्ये एउटा मन्त्रालय लिनेछ । दुई दलबीच संसदीय समिति भागबन्डामा पनि सहमति जुटेको छ । प्रदेशमा सात वटा विषयगत समिति छन् । ति समिति पनि एउटा प्रतिपक्षी दललाई छाडेर बाँकी आधाआधा गर्ने दुई दलको सहमति छ ।

सहमति कार्यान्वयन भए माओवादी केन्द्रले सार्वजनिक लेखा समिति पाउनेछ । सार्वजनिक  लेखा समितिको  सभापति प्रतिपक्षी दलले पाउने परम्परा छ । अन्य ६ वटा समिति दुई दलले बाँड्नेछन् । संसदीय समितिको विषयमा छलफल भएपनि सहमति भइनसकेको भण्डारीले बताए । ‘संसदीय समितिका विषयमा छलफल भयो, सहमतिको नजिक छौं,’उनले भने,‘ सरकार बिस्तारपछि यो विषय पनि टुङ्गो लाग्छ ।’

छलफलमा सहभागि एक नेताका अनुसार ७ मध्ये दुई वटा समिति प्रतिपक्षी दललाई दिएर पाँच वटा समितिको नेतृत्व कांग्रेस एमालेले भागबन्डा गर्ने विषयमा पनि छलफल भएको थियो । तर नेता व्यवस्थापन गर्नुपर्ने दबाब भएका कारण सार्वजनिक लेखा समिति बाहेक अन्य समिति आधाआधा गर्ने निष्कर्ष दुई दलको  छ ।

१७ असारमा केन्द्रमा कांग्रेस एमालेबीच नयाँ समीकरण बनेपनि कोशी प्रदेशमा माओवादी केन्द्रले सरकार छाडेको थिएन । शुक्रबार मुख्यमन्त्रीलाई दिएको समर्थन कायम नै राखेर माओवादी केन्द्रले सरकार छाडेपछि कांग्रेस र एमालेले सहकार्यको सहमति गरेका हुन् ।