कोशी प्रदेश सरकारबाट बाहिरिने माओवादी केन्द्रको निर्णय

विराटनगर । माओवादी केन्द्रले काेशी प्रदेश सरकारबाट बाहिरिने निर्णय गरेकाे छ । केन्द्रीय सत्तासमीकरण फेरिएपनि नेकपा एमाले नेतृत्वको प्रदेश सरकार माओवादी केन्द्रले छाडेकाे थिएन् ।  मुख्यमन्त्री हिक्मतकुमार कार्कीले सरकार सञ्चालन गर्न गाह्रो भएको बताएपछि माओवादी केन्द्रले बाहिरिने निर्णय गरेकाे हाे ।

माओवादी केन्द्रका मन्त्रीहरुले आजै राजीनामा बुझाउदैछन् । आज मन्त्रीहरुले राजीनामा बुझाउने माओवादी केन्द्र संसदटीय दलका नेता इन्द्रबहादुर आङ्बाेले बताए ।

माओवादी केन्द्रका मन्त्रीहरुले राजीनामा पत्र पनि तयार गरेका छन् ।  ‘हामी आज सरकार छाड्छौं,’ भौतिक पूर्वाधार मन्त्री गणेश उप्रेतीले भने,‘ केन्द्रकाे समीकरण अनुसार अघि बढ्नु पर्ने अवस्था आयाे ।’

कोशी प्रदेश सरकारमा नेकपा माओवादी केन्द्रबाट उप्रेतीसँगै राजेन्द्र कार्की स्वास्थ्य र नारायण बुर्जामगर पर्यटन वन तथा वातावरण मन्त्री र बन्दना झागड पर्यटन वन तथा वातावरण राज्यमन्त्री छन् ।

सरकारबाट बाहिरिने निर्णयमा पुगेको माओवादी केन्द्रले सरकारलाई दिएको समर्थन पनि फिर्ता लिने भएको छ ।

सरकार गठनको अन्तिम विकल्प संविधानको धारा १६८ को उपधारा ५ अनुसार मुख्यमन्त्री बनेका केदार कार्कीलाई संकल्प प्रस्ताव मार्फत पदमुक्त गर्दै हिक्मतकुमार कार्की सोही उपधारा अनुसार २७  बैशाख २०८१ मा मुख्यमन्त्री बनेका थिए ।

नयाँ सरकार गठन विरुद्ध केदार कार्कीले दायर गरेको रिटमा सर्वोच्च अदालतले हिक्मतकुमार कार्कीको पक्षमा फैसला गरेपनि पूर्णपाठ आएको छैन । पूर्णपाठ नआएसम्म माओवादी केन्द्रले समर्थन फिर्ता नगरोस भन्ने मुख्यमन्त्री कार्कीकाे चाहाना छ । तर सरकारबाट फिर्ता भएपछि समर्थन पनि फिर्ता हुने माओवादी केन्द्र संसदीय दलका नेता इन्द्रबहादुर आङ्बोले बताए ।