विराटनगरमा मापसे चेकिङ छलेर भागेका चालककाे साथबाट गाँजा बरामद

विराटनगर । विराटनगरमा मापसे (मादक पदार्थ सेवन) चेकिङ छलेर फुत्किएका मोटरसाइकल चालकको साथबाट गाँजा बरामद भएको छ ।

विराटनगर महानगरपालिका–९ शनिमन्दिरमा ट्राफिक प्रहरीले बिहीबार राति सवारीसाधन चेकजाँच गरिरहेको थियो ।

सवारीसाधनका चालकको मापसे चेकजाँच गरिरहेको ट्राफिकको टोलीले राति ८ः२० बजेतिर प्रदेश १–०२–०४७ प ४४६५ नम्बरको मोटरसाइकललाई रोक्न खोज्यो । तर, नरोकिकन मोटरसाइकल लिएर चालक भाग्न खोजे । मोरङ प्रहरीका निमित्त प्रवक्ता, इन्सपेक्टर हेमराज ओलीका अनुसार भाग्ने क्रममा उक्त मोटरसाइकलले पार्किङ गरेर राखिएको अर्को को २० प ८६६८ नम्बरको मोटरसाइकललाई ठक्करसमेत दिएको थियो ।

ठक्करबाट मोटरसाइकलको अगाडिको भागमा क्षति पुगेको छ । त्यसलगत्तै प्रदेश १–०२–०४७ प ४४६५ नम्बरको मोटरसाइकल छाडेर चालक फरार भए ।

पिछा गर्दै गएको ट्राफिक प्रहरीले केही पर पुगेपछि चालक धनकुटाको सहिदभूमि गाउँपालिका–७ का अन्दाजी ३८ वर्षीय जीवन राईलाई नियन्त्रणमा लिएको इन्सपेक्टर ओलीले बताए । उनका अनुसार राईले बोकेको झोला खानतलासी गर्दा १९ किलोग्राम गाँजा बरामद भएको छ ।

पक्राउ परेका राईसहित नियन्त्रणमा लिइएको मोटरसाइकल र गाँजालाई जिल्ला प्रहरी कार्यालयमा राखिएको छ । पक्राउ परेका राईविरुद्ध लागूऔषध ऐनअन्तर्गतको मुद्दा चलाइने ओलीले बताए ।