उच्च अदालत विराटनगरबाट तीन हजार मुद्दा फर्छ्योट

विराटनगर । उच्च अदालत विराटनगरले गत आर्थिक वर्ष २०८०–८१ मा ३ हजार २ सय ५४ वटा मुद्दा फर्छ्योट गरेको छ । उच्च अदालत विराटनगरका रजिष्ट्रार जगदिशप्रसाद भट्टका अनुसार ४३ दशमलव ७५ प्रतिशत मुद्दा फर्छ्योट भएको हाे ।

अदालतले पन्चवर्षे योजना अनुसार काम गरिरहेको छ । उच्च अदालत विराटनगरमा पछिल्लो पाँच बर्षमा २६ हजार ३० वटा मुद्दा दर्ता भएका थिए । जसमा १४ हजार १ सय २ वटा मुद्दा फर्छ्योट भएको छ । पाँच बर्षमा कुल ४५ दशमलव ८२ प्रतिशत मुद्दामात्रै फर्छ्योट भएको अदालतले जनाएको छ ।

२०८० साउनदेखि २०८१ असार मसान्तसम्मको लगत अनुसार उच्च अदालतमा लक्ष्यभन्दा १ हजार ४ सय ७१ वटा मुद्दा बढी दर्ता भएको थियाे । ३ हजार ४ सय २२ वटा नयाँ मुद्दा दर्ता हुने अनुमान गरिए पनि नयाँ दर्ता मुद्दाको संख्या ४ हजार ८ सय ९३ पुगेको रजिष्ट्रार भट्टले जानकारी दिए ।

तल्लो अदालतबाट भएको आदेशमा चित्त नबुझी निवेदन वा प्रतिवेदनमार्फत गत आवमा जिम्मेवारी सरेका १९६ र नयाँ दर्ता निवेदन प्रतिवेदन १ हजार ४३ गरी जम्मा १ हजार २३९ वटा निवेदन दर्ता भएका थिए । जसमध्ये १ हजार १६३ वटा फर्छ्योट भएको छ । गत आव २०८०–८१ मा सवैभन्दा बढी सरकारवादी फौजदारीतर्फ ३ हजार ९३ र दोस्रोमा व्यक्तिवादी देवानी २ हजार १७४ वटा मुद्दा दर्ता भएका थिए ।