विदेशबाट फर्किएपछि बुंगुरपालन र फलफूलखेतीमा व्यस्त सुगम

भोजपुर । भोजपुर पौवादुङमा गाउँपालिका–६ ठूलोदुम्मा छिदुवाका २७ वर्षीय सुगम राईले सात वर्ष विदेशमा बिताए । स्वदेश फर्किएपछि भने उनी बुंगुरपालन र फलफूलखेतीमा व्यस्त छन् । आम्दानी पनि राम्रो गरिरहेका छन् ।

राईले सेन्मायुङ कृषि तथा पशुपालन फार्म दर्ता गरेर व्यावसायिक बुंगुरपालन, कागती, एभोकाडो, आँप, अनार, लिचीलगायत खेती गर्दै आएका छन् । बुंगुर फार्मबाट उत्पादन हुने मलको सदुपयोग गर्ने लक्ष्यले बुंगुरपालनसँगै फलफूलखेती गरिरहेको उनले बताए । राईको फार्ममा अहिले ४१ वटा बुंगुर छन् ।

भविष्यमा बुंगुरपालन तथा फलफूलखेतीबाट वार्षिक ५० देखि ६० लाख रुपैयाँसम्म कारोबार गर्ने लक्ष्यका साथ थप विस्तारमा जुटेको राईले बताए । विदेशमा सात वर्ष बिताएर फर्किएका उनले त्यहाँ सिकेको सीपलाई सदुपयोग गर्दै व्यावसायिक कृषिमा जुटेको सुनाए । ‘वार्षिक रु १२ देखि १५ लाखसम्म कारोबार हुन्छ । त्यसबाट खर्च कटाउँदा वार्षिक आठदेखि १० लाख रुपैयाँसम्म आम्दानी हुन्छ’, उनले भने ।

स्वदेशमा व्यावसायिक रूपमा काम गर्नसके अर्काको देशमा गएर पसिना बगाउनु नपर्ने राई बताउँछन् । आफ्नो फार्ममा उत्पादन भएका बुंगुर खरिद गर्न ठेकेदार घरमा आउने उनले सुनाए । उनले फार्ममा स्थानीय जातसँगै उन्नत जातका हेमसार, धराने कालो बुंगुरलगायत पालन गरिरहेका छन् ।

फार्ममा एक सय २० केजीदेखि एक सय ५० केजीसम्मको बुंगुर छन् । ‘बुंगुर बिक्रीको कुनै समस्या छैन’, उनले भने, ‘ धरान, विराटनगरबाट ठेकेदार नै आउँछन् । मागलाई धान्न धौ धौ छ । यो व्यवसायलाई अझ विस्तार गर्ने लक्ष्यका साथ काम गरिरहेको छु ।’

कृषि कर्ममा मेहनत गरेर लाग्न सके जीवन गुजारा गर्न समस्या नरहेको व्यवसायी राईले बताए । उनलाई व्यवसायमा घरपरिवारले सहयोग गर्दै आएका छन् । व्यावसायिक कृषि कर्ममा लाग्ने किसानलाई राज्यले पनि आवश्यक सहयोग गर्नुपर्ने उहाँको धारणा छ । बुंगुरपालन, फलफूल तथा तरकारीखेतीमा आफूले जानेको सीप अन्य किसानलाई सिकाउँदै आएको व्यवसायी राई बताउँछन् ।