प्रहरीको गाडी दुर्घटना हुँदा ३० जना सामान्य घाइते

विराटनगर । विराटनगर महानगरपालिका – १५ भट्टीमोडमा प्रहरीको गाडी दुर्घटना हुँदा ३० जना घाइते भएका छन् । घाइते मध्ये पाँच जनाको अवस्था गम्भीर छ ।

बुधबार साँझ इलाका प्रहरी कार्यालय रानीमा थप मद्दतका लागि प्रहरी निरीक्षकको नेतृत्वमा गएको प्रहरी टोली चढेको गाडी दुर्घटनामा परेको थियो ।

घाइते भएका ३० जनामध्ये कोशी अस्पतालमा २१ जना, न्यूरो अस्पतालमा ५ जना, विराट टिचिङ अस्पतालमा २ जना र नोबेल अस्पतालमा एक जनाको उपचार भइरहेको छ । पाँच जना गम्भीर घाइते देखिएको भएपनि सबैको अवस्था खतरामुक्त रहेको प्रहरीले बताएको छ ।

मुस्लिम सामुदायको ‘मोहरम’ पर्वको सुरक्षाको लागि मोरङ प्रहरीले थप मद्दत माग भएपछि प्रदेश प्रहरी तालिम केन्द्रबाट टोली परिचालन भएको थियो । भट्टीमोडको टर्निङमा स्कुलबाट आएका विद्यार्थीहरूलाई जोगाउन खोज्दा गाडी दुर्घटना भएको प्रारम्भीक जानकारी आएको प्रदेश प्रहरी कार्यालयका एसएसपी भीम दाहालले जानकारी दिए । गाडीमा ५४ जना प्रहरी सवार थिए ।