आइतबार विश्वासको मत लिने तयारीमा प्रधानमन्त्री ओली

काठमाडौं । प्रधानमन्त्री केपी ओलीले आइतबार विश्वासको मत लिने तयारी गरेका छन् ।

कांग्रेसकाे समर्थनमा ३० असारमा ओली प्रधानमन्त्री नियुक्त भएका थिए । नियुक्तीको ३० दिन भित्र विश्वासको मत लिनुपर्ने संवैधानिक प्रावधान छ । तर  नियुक्तीको एक सातापछि  आइतबार ६ साउनमा  ओलीले विश्वासको मत लिने तयारी गरेका हुन् ।

सत्तापक्षका मुख्य सचेतक महेश बर्तौलाले आइतबार प्रतिनिधिसभामा ओलीले विश्वासको मत लिने निर्णय भएको जानकारी दिए ।

‘संविधानतः प्रधानमन्त्री नियुक्ति भइसकेपछि ३० दिनभित्र विश्वासको मत लिने व्यवस्था छ, तर प्रधानमन्त्रीज्यूलाई तुरुन्तै संसदको विश्वास लिएर काम अघि बढाउन सहजता हुन्छ भनेर हामीले केही दिनभित्रै मत लिने तयारीमा लागेका हौं,’ बर्तौलाले भने, ‘आइतबार नै विश्वासको मत लिनेगरी हामी अघि बढ्छौं ।’ एमालेले आजै सत्तापक्षको मूख्य सचेतकमा महेश बर्तौलालाई नियुक्त गरेको थियो । उनले सत्तापक्ष दलको मुख्य सचेतकको भूमिका निर्वाह गर्नेछन् ।