सुदूरपश्चिममा दोहोरियो कोशीकाे समस्या

धनगढी । सुदूरपश्चिम प्रदेशमा ‘बजेट होलिडे’ को अवस्था आएको छ । सरकार फेरवदलको दौडधुपले गर्दा सरकारले खर्च गर्न नपाउने अवस्थामा आएको हो ।

गत वर्ष सत्ता परिवर्तनको खेलले कोशी प्रदेशमा बजेट होलिडे भएको थियो । नयाँ आर्थिक वर्ष २०८१–८२ को पहिलो दिनदेखि सुदूरपश्चिम प्रदेश ‘बजेट होलिडे’ भएको हो ।

संवैधानिक व्यवस्थाअनुसार १ असारमा ल्याइएको बजेट असार मसान्तभित्र पारित गरिसक्नुपर्छ । तर केन्द्रमा सत्तासमीकरण फेरिएपछि एमालेले मुख्यमन्त्री दीर्घबहादुर सोडारीलाई दिएको समर्थन फिर्ता लिएपछि प्रदेश सभामा बजेट माथिको छलफलसमेत अघि बढ्न सकेन । संघमा कांग्रेस र एमालेको गठबन्धन बनेपछि २० असारमा एमाले सुदूरपश्चिम सरकारबाट बाहिरिएको थियो ।

सोडारी नेतृत्वको सरकारमा आर्थिक मामिलामन्त्री रहेका एमालेका सुरेन्द्रबहादुर पालले १ असारमा आर्थिक वर्षका लागि ३१ अर्ब ६२ करोड २८ लाख बराबरको बजेट ल्याएका थिए ।

मुख्यमन्त्रीका कारण ‘प्रदेश होलिडे’ मा गएकाले भन्दै एमालेले उनको राजीनामा माग गरेको छ । तर मुख्यमन्त्री सोडारीले भने अध्यादेशमार्फत भए पनि बजेट ल्याउने तयारी गरेका छन् । मुख्यमन्त्री सोडारीले प्रदेशलाई ‘बजेट होलिडे’को अवस्थामा रहन नदिन अध्यादेशमार्फत बजेट ल्याउने तयारी भइसकेको बताए ।