साउनबाट विकासे बजेट खर्च गर्न मुख्यमन्त्रीको सक्रियता

विराटनगर । साउनबाट नै विकास याेजना कार्यान्वयनमा लैजानका लागि कोशी प्रदेशका मुख्यमन्त्री हिक्मतकुमार कार्कीले प्रमुख सचिवसँग कार्य सम्पादन सम्झौता गरेका छन् ।

आर्थिक वर्ष २०८१–८२ को बिकास बजेटलाई साउनबाटै खर्च गर्नका लागि प्रमुख सचिव केदारनाथ शर्मासँग कार्य सम्पादन सम्झौता गरेका हुन् ।

नयाँ आर्थिक वर्ष सुरु नहुँदै प्रदेश सरकारका सबै मन्त्रीहरूलाई राखेर मुख्यमन्त्री कार्यालयका कार्कीले प्रमुख सचिव केदारनाथ शर्मासँग कार्य सम्पादन सम्झौता गरे, लगत्तै  शर्माले  मुख्यमन्त्री कार्यालयका सचिव बद्री कार्की र विष्णुप्रसाद पौडेलसँग कार्य सम्पादन सम्झौता गरे ।

मुख्यमन्त्री कार्कीले साउन १५ भित्र सबै मन्त्रीलाई सचिवसँग र सचिवले मातहतका कार्यालय प्रमुख र महाशाखा प्रमुखसँग सम्झौता गर्नका लागि निर्देशन दिएका छन् ।

१५ साउन भित्रै कार्य योजना बनाएर एक करोडभन्दा माथिको योजना कार्यान्वयनमा लैजान निर्देशन पनि दिएका छन् । आर्थिक वर्षको अन्तिममा मात्रै खर्च गर्ने परिपाटी अन्त्य गर्न आर्थिक वर्ष नलाग्दै सम्झौता गरेको  कार्कीले बताए । अब प्रदेश सरकारले साउनदेखि नै विकासे कार्यक्रम कार्यान्वयनमा लैजान उनले बताए ।

कोशी प्रदेश सरकारले चालु आर्थिक वर्षको अन्तिम २५ दिनमा मात्रै ८ अर्ब १९ करोड ६९ लाख ६८ हजार ४४१ रुपैयाँ खर्च गरेको  थियो । चालु आर्थिक वर्षका लागि ३६ अर्ब ८१ करोड ९० लाख ७४ हजार रुपैयाँ बजेट विनियोजन गरेको सरकारले  जम्मा २८ अर्ब ३६ करोड ७८ लाख ७६ हजार ६ सय ४४ रुपैयाँ मात्रै खर्च गर्न सक्यो ।