प्रधानमन्त्री ओलीको पक्षमा दुई तिहाइ बहुमत

काठमाडौं । प्रधानमन्त्री केपी शर्मा ओलीले दुई तिहाइ बहुमत देखाएका छन् । सोमबार पद तथा गोपनीयताको शपथ ग्रहण गरेका ओलीले मन्त्रीपरिषद गठनमा साना दललाई समेट्दै आफ्नो पक्षमा दुई तिहाइ बहुमत जुटाएका हुन् ।

कांग्रेसको समर्थनमा प्रधानमन्त्री बनेका ओलीले सरकारमा नेपाली कांग्रेससँगै जसपा र लोसपालाई सहभागि गराएका छन् । केन्द्र सरकारमा सहभागि नगराएपनि जनमत पार्टीलाई मधेस सरकारको नेतृत्व दिएका छन् ।

२७५ सदस्यीय प्रतिनिधि सभामा दुई तिहाइ बहुमतका लागि १८४ सांसदको समर्थन चाहिन्छ। ओली नेतृत्वको गठबन्धन दलसँग १८४ मत छ । याे टुप्लुक्क दुई तिहाइ हाे ।

नेपाली कांग्रेसका ८८, नेकपा एमालेका ७९, जसपाका ७, लोसपाका ४, जनमत पार्टीको ६ सांसद छन् । सभामुखले मत विभाजन प्रक्रियामा सहभागी हुन पाउदैनन् । तर अन्य साना दल र स्वतन्त्र सांसदले ओलीलाई समर्थन गर्ने सम्भावना छ ।

ओली नेतृत्वको सरकारमा कांग्रेसबाट १० जना, एमालेबाट ८ जना, जसपाबाट २ जना, लोसपाबाट एक जना मन्त्री बनेका छन् ।