तीन वर्षमा प्रदेश खेलकुदको गन्तव्य बन्छ : मुख्यमन्त्री कार्की 

विराटनगर । कोशी प्रदेशका मुख्यमन्त्री हिक्मतकुमार कार्कीले अबको तीन वर्ष भित्रमा कोशी प्रदेशलाई खेलकुदको महत्वपूर्ण गन्तव्य बनाउने बताएका छन् ।

प्रदेश खेलकुद विकास वाेर्डले विराटनगरमा आयोजना गरेकाे खेलाडी तथा खेल क्षेत्रमा महत्वपूर्ण योगदान पुर्याउने व्यक्तिको सम्मान कार्यक्रमलाई सम्बोधन गर्दै कार्कीले  राजनीतिक अस्थिरताका कारण  ओझेलमा परेको खेलक्षेत्रको विकास गर्ने बताए । कोशी प्रदेशमा देखिएको राजनीतिक अस्थिरताको दौडको अन्त्य गर्दै  तीन वर्ष भित्र कोशी प्रदेशलाई खेलकुदको महत्वपूर्ण गन्तव्यको रुपमा स्थापित गर्ने बताएका हुन् । 

खेल क्षेत्रको विकासका लागि तीन तहका सरकारबीच समन्वय हुन जरुरी रहेको उनले बताए । ‘राज्यको पुनर्संरचनासँगै अहिले स्थानीय, प्रदेश र सङ्घबाट खेलकुदको विकासका लागि केही पहल र प्रयत्नहरू भएका छन्,’ उनले भने,‘ यद्यपि खेलकुदको विकासका लागि तीन तहबीच समन्वयात्मक पहल भने हुन सकेको छैन ।’  

कार्यक्रममा भर्खरै सम्पन्न अन्तर प्रदेश राष्ट्रिय खेलकुद र राष्ट्रपति रनिङ शिल्ड प्रतियोगितामा पदक प्राप्त खेलाडी तथा खेल क्षेत्रमा महत्वपूर्ण योगदान पुर्‍याउने दुई सय जनालाई सम्मान गरिएको थियो ।

सोही अवसरमा खेल क्षेत्रमा कलम चलाउने पत्रकार नवीन अर्याल, भूमिका पाख्रिन, भूमिराज पराजुली, चुमन बस्नेत, किशोर बुढाथोकी, पुष्पराज थपलियालगायतका सञ्चारकर्मीलाई नगदसहित सम्मान गरिएको थियो ।