‍प्रधानमन्त्री प्रचण्डले आज विश्वासको मत लिने

काठमाडौं । अल्पमतमा परेका प्रधानमन्त्री पुष्पकमल दाहाल प्रचण्डले आजको प्रतिनिधि सभा बैठकमा विश्वासको मत लिँदैछन् । विश्वासको मत लिने प्रयोजनका लागि बिहान ११ बजे प्रतिनिधि सभा बैठक बोलाइएको छ ।

१७ असारमा नेपाली कांग्रेस र एमालेबीच केपी शर्मा ओलीको नेतृत्वमा नयाँ सरकार गठन गर्ने समझदारी बनेपछि प्रचण्ड अल्पमतमा परेका थिए ।

सरकारमा सहभागी दलले समर्थन फिर्ता लिएको ३० दिनभित्र प्रधानमन्त्रीले विश्वासको मत लिनुपर्ने संवैधानिक व्यवस्थाका कारण प्रचण्डले आज विश्वासको मत लिन लागेका हुन् ।

११ पुस २०७९ मा प्रधानमन्त्री बनेका प्रचण्डलाई २७५ सदस्यीय प्रतिनिधिसभामा बहुमतका लागि १३८ मत चाहिन्छ । तर उनीसँग ६३ मत मात्र छ ।

उनले विश्वासको मत पाउने सम्भावना छैन । विश्वासको मत परीक्षणपछि आजै नयाँ सरकार गठनको प्रारम्भ हुनेछ । कांग्रेस, एमाले लगायत दलले नयाँ सरकार गठनका लागि आजै दाबी पेश गर्ने तयारी गरेका छन् ।