सुन्दरहरैँचामा कुखुरा फार्म भित्र सञ्चालकको शव भेटियो, कामदार फरार

विराटनगर । मोरङको सुन्दरहरैँचामा कुखुरा फर्म सञ्चालककाे शव बीभत्स अवस्थामा भेटिएकाे छ ।

बिहीबार बिहान सुन्दरहरैँचा नगरपालिका–९ का ४९ वर्षीय सहदेव बजगाईंको शव उनले नै सञ्चालन गरिरहेकाे फर्म भित्र हत्या गरिएकाे अवस्थामा भेटिएकाे हाे ।

आज बिहान उनी फर्ममा गएका थिए । नफर्किएपछि बिहीबार विहान साढे १० बजे आफन्त गएर हेर्दा बीभत्स अवस्थामा शव देखेपछि प्रहरीलाई खबर गरेका थिए ।

घटनापछि फर्मका कामदार भने फरार छन् ।

मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार बजगाईंको टाउको क्षतविक्षत र शरीरका अन्य भागमा चोटपटक रहेको अवस्थामा शव फेला परेकाे छ ।  घटनाको प्रकृति र घटनास्थलको अवस्था हेर्दा हत्या भएको प्रष्ट हुने उनले बताए ।

घटनास्थलमा रगत लतपतिएको अवस्थामा एउटा बन्चरो र दाउ पनि फेला परेको छ ।

बजगाईंको घरनजिकै कुखुरा फार्म छ । उनले  फार्मकाे रेखदेखका लागि एक दम्पतीलाई राखेका थिए । घटनापछि कामदार दम्पती नै फरार छन् ।

प्रहरीले फरार भएका दम्पतीमाथि आशंका गरेको छ । उनीहरुको खोजी भइरहेको डीएसपी बस्नेतले जानकारी दिए । ‘शव फर्म भित्रै छ, तर कामदार छैनन, घटनामा उनीहरुकाे संलग्नताकाे आशंका छ,’ उनले भने, ‘ अनुसन्धानपछि सबै विषय खुल्छ ।’