रास्वपा महामन्त्री ढकालकाे जिम्मेवारी खाेसियाे, अब साधारण सदस्य मात्रै

काठमाडौं । राष्ट्रिय स्वतन्त्र पार्टी (रास्वपा)ले महामन्त्री तथा प्रवक्ता मुकुल ढकाललाई पार्टी जिम्मेवारीबाट हटाएको छ । रास्वपाको केन्द्रीय समितिको बैठकले ढकाललाई महामन्त्री र प्रवक्ताको जिम्मेवारीबाट हटाउने निर्णय गरेको हो । संस्थापक महासचिव ढकाल पार्टीमा साधारण सदस्यमात्रै छन् ।

मंगलबारकाे केन्द्रीय समितिको बैठकपछि पत्रकार सम्मेलनमा नेता सोबिता गौतमले अनुशासन आयोगको सिफारिस अनुसार केन्द्रीय समितिले साधारण सदस्य कायम राखेर अरु जिम्मेवारीबाट हटाउने निर्णय गरेको जानकारी दिइन् ।

ढकाललाई निर्णय चित्त नबुझे ३५ दिनभित्र पुनरावेदन गर्न पाउने मौकासमेत दिइएको उनले बताइन् ।

देशयात्रा गरेपछि ढकालले प्रतिवेदन बुझाउने क्रममा सभापति रवि लामिछानेको कार्यशैली प्रति असन्तुष्टि जनाएका थिए ।

यात्राको समीक्षा प्रतिवेदन पार्टीमा बुझाउनुभन्दा अघि नै उनले मिडियामा सार्वजनिक गरेको, केन्द्रीय समिति बैठक लाइभ प्रसारण हुनुपर्ने माग सुनुवाइ नभएको भन्दै कालोटेप लगाएर बसेको र पार्टी सभापतिविरुद्ध अभिव्यक्ति दिएको आरोपमा उनीमाथि अनुशासन आयाेगले छानविन गरेकाे थियाे ।

गत बुधबारको रास्पाको बैठकले मुकुललाई सात दिनका लागि निलम्बन गर्ने निर्णय गरेको थियो । 

महामन्त्रीबाट पदमुक्त भएका ढकालले रवि लामिछाने क्लबबाट निष्कासित भएको बताएका छन् ।

‘रवि लामिछाने क्लबबाट निस्कासित भएको हुँ ,’ उनले भने,‘राष्ट्रिय स्वतन्त्र पार्टीभित्र घण्टी बज्न रोकिँदैन ।’