विराटनगरमा तीन जनामाथि धारिलाे हतियार प्रहार, एक जनाको मृत्यु

विराटनगर । विराटनगरमा धारिलो हतियारले घोपेर एक युवकको हत्या भएको छ । दुई जना गम्भीर घाइते भएका छन् ।

सोमबार राति करिब १० बजे विराटनगर महानगरपालिका–२ स्थित नेपाल टेलिकमनजिक तीन जना युवक गम्भीर अवस्थामा भेटिएका थिए । तीन मध्ये एकको उपचारको क्रममा मृत्यु भएको हो ।

मोरङका प्रहरी उपरीक्षक नवराज कार्कीका अनुसार कटहरी गाउँपालिका–१ जमटोकीका २१ वर्षीय करण कामतको मृत्यु भएको हो । कटहरी–१ जमटोकीका २२ वर्षीय विक्रम मण्डल र १७ वर्षीय अमन राय घाइते छन् । प्रहरीले भने घाइतेलाई अस्पताल पुर्याएपछि मात्रै घटनाको जानकारी पाएको थियो ।

मृतक कामतको छात्ती र कम्मरको भागमा सानो चक्कुले घोपेको जस्तो चोट देखिएको प्रहरी उपरीक्षक कार्कीले बताए । ‘सानो चक्कुले प्रहार गरेजस्तो देखिन्छ,’उनले भने,‘ मृतक र घाइतेको शरीरमा एउटै हतियार प्रहार भएजस्तो देखिन्छ ।’

घाइते मध्ये रायको अवस्था गम्भीर छ । उनको कोखा र ढाडमा धारिलो हतियारले घोपेको चोट छ । मण्डलको पाखुरा र ढाडमा घोपिएको चोट छ । उनीहरुको नोबेल शिक्षण अस्पतालमा उपचार भइरहेको छ ।

प्रहरी उपरीक्षक कार्कीका अनुसार एक जनाको हत्या र दुई जना घाइते भएको घटनामा कसको संलग्नता छ भन्ने खुलेको छैन । सोमबार दिउँसो गाउँमै झगडा भएको देखिएका कारण अन्य व्यक्तीको संलग्नता हुनसक्ने उनले बताए ।

घटनामा संलग्नको खोजी तिब्र पारिएको बताउँदै उनले सबै विषय खुल्ने क्रममा रहेको बताए । ‘दिउँसो उनीहरुको कतै झगडा भएको रहेछ, त्यसको रिसमा घटना भएजस्तो देखिन्छ,’ उनले भने,‘ आफैआफै झगडा गरेको पनि हुनसक्छ, हामी अनुसन्धानमा छौं ।’

प्रहरीले घटनास्थलबाट एउटा मोबाइल फेला परेको छ । प्रहरी स्रोतका अनुसार मृतक र घाइते लागूऔषध प्रयोगकर्ता जस्ताे देखिन्छ ।