यातना दिएर यौनधन्दामा लगाएको आरोपमा युवती पक्राउ, ६ जनाकाे उद्धार

विराटनगर । विराटनगरमा महिलालाई जवरजस्ती यौनधन्दामा लगाएको आरोपमा प्रहरीले एक युवतीलाई पक्राउ गरेको छ । ६ युवतीको उद्दार गरेको छ ।

विराटनगरको नयाँ गुद्री बजारमा भाडामा लिएको घरको फ्ल्याटमा राखेर यातना दिँदै जबरजस्ती यौन व्यवसायमा लगाएको आरोपमा झापाको विर्तामोड नगरपालिका– ८ गरामनी घरभई विराटनगरमा बस्दै आएकी २४ वर्षीया सन्ध्या चुँडाललाई पक्राउ गरेको हो ।

प्रहरीले विराटनगर– ११ नयाँ गुद्रीबाट २१ देखि २३ वर्ष उमेर समूहका ६ जना युवतीको उद्धार गरेको छ । उद्धार गरिएकामध्ये काठमाडौं, काभ्रेपलाञ्चोक, स्याङ्जा र उदयपुरका १/१ जना र झापाका २ जना रहेको मोरङ प्रहरी उपरीक्षक नवराज कार्कीले जानकारी दिए । उनीहरुलाई रोजगारी दिने भन्दै विराटनगर बोलाएर जवरजस्ती यौनजन्य कार्यमा लगाएको पाइएको प्रहरीले बताएको छ ।

चुँडालको समूहले पठाएको स्थानमा जान नमाने युवतीलाई यातना दिने गरेको देखिएको प्रहरीको दाबी छ । उद्धार गरिएका केही युवतीको शरीरमा चोटपटक पनि प्रहरीले बताएको छ ।

प्रहरीका अनुसार चुँडाल र सुनसरीको इनरुवा घर भएका अन्दाजी ३० वर्षीय राजकुमार साहले विराटनगरको नयाँ गुद्रीमा घरको फ्ल्याट भाडामा लिएर युवतीहरुलाई राख्ने र अन्यन्त्र लगेर यौन व्यवसायमा लगाउने गरेको थियो । चुँडाल पक्राउ परेपनि साह भने फार छन् । साहको खोजी भइरहेको प्रहरीले बताएको छ ।