मानसिक बिरामीको उपचारमा पुरुष नर्स !

विराटनगर । अधिकांश अस्पताहरुमा विरामीकाे सेवामा महिला नर्स हुन्छन् । तर विराट मेडिकल कलेज शिक्षण अस्पतालको मानसिक विभागकाे दृश्य भने फरक छ ।

मानसिक विभागमा आउने सबै बिरामीको सेवामा महिला नभएर सबै पुरुष नर्स खटिएका छन् । विराटकाे मानसिक विभागमा दैनिक सरदर ३० जना बिरामी उपचारका आउँछन् । ती बिरामीको उपचारमा पुरुष नर्सले सहयाेग गरिरहेका हुन् ।

मानसिक बिरामीहरूको सेवा गर्ने काम कष्टकर र जोखिमपूर्ण हुन्छ । उपचार गर्न भर्नाका भएका बिरामीहरू कोही मानसिक रूपले विक्षिप्‍त हुन्छन् भने कोही चिच्याउने कराउने , होहल्ला गर्ने कुटपिट गर्ने खालका पनि हुन्छन् । प्रायले आफूलाई बिरामी मान्दैनन् र औषधी र खाना पनि  खान चाहदैनन् ।

बिरामी जाँचेर औषधी लेख्ने दक्षता हासिल गरेपनि आफूहरू थप अनुभव हासिल गरेर दक्ष स्वास्थ्यकर्मी बन्नका लागि बिरामीको उपचारमा लागिपरेको विराट अस्पताल  मानसिक विभागमा कार्यरत स्वास्थ्यकर्मी निरजकुमार देव बताउँछ ।

निरज जस्तै तीन वर्षे स्वास्थ्य सहायक (एचए) कोर्ष गरेर तालिम  लिएका विजय राजवंशी, मनोज मेहता, प्रशान्त ठाकुर, नितेशकुमार मेहता र सिकन्द्र यादवलगायत पुरुष नर्स मानसिक रोगीहरूको  सेवा गरिरहेका छन् ।

स्वास्थ्यकर्मी प्रशान्त ठाकुरका अनुसार मानसिक वार्डमा उपचार गराउन आएका कतिपय बिरामीको स्वभाव हिंस्रक हुन्छ ।  हरेक बिरामीको स्वभाव फरक फरक हुने भएकाले ध्यान दिएर उपचार गर्नुपर्ने उनी बताउँछन् । सजगता र धैयर्तासहित उपचारमा सहयोगबाट बिरामी निको भएर घर फर्कँदा खुसी लाग्ने नर्स सिकेन्द्र यादव बताउँछन ।

मानसिक विभागमा भर्ना भएका बिरामीको सेवामा स्वास्थ्य सहायक पढेका पुरुषहरूले पनि महिला नर्स सरह उपचार प्रभावकारी  बनाउन सहयोग गरिरहेको  मानसिक विभागका  रेसिडेन्सियल इञ्चार्ज चिकित्सक डाक्टर शीर्षकदीप श्रेष्ठ बताउँछन् ।

गणेश लम्साल, विराटनगर